![](/share/icons/crystal/16x16/mimetypes/pdf.png)
Sámediggeválgii searvamii gáibiduvvo ahte lea juogo registrerejuvvon sámepolitihkalaš organisašuvdnan, dahje sáhttá bidjat listta válgabiirres maid leat vuolláičállán olbmot geat leat Sámedikki jienastuslogus.
Sámepolitihkalaš organisašuvdna
Ođđa sámepolitihkalaš organisašuvnna registreremii gáibiduvvojit unnimusat 200 vuolláičállosa olbmuin geat leat Sámedikki jienastuslogus (gč. § 20 d sámediggeválgga láhkaásahusas). Daid ferte bidjat ohcamis mielddusin dalle go bivdá sámepolitihkalaš organisašuvnna registrerejuvvot.
Jos organisašuvdna lea juo registrerejuvvon sámepolitihkalaš organisašuvdnan Sámedikki registaris, de galgá organisašuvdna maŋimusat ođđajagemánu 2. b. 2013 sáddet ođasmahttojuvvon dieđuid dan birra geat dat leat mielde organisašuvnna doaimmaheaddji orgánas.
Jos organisašuvdna lea ožžon unnimusat 60 jienastaga válgabiirres dahje unnimusat 200 jienastaga olles riikkas, de lea doarvái jos listaevttohusa leat vuolláičállán unnimusat guovttis organisašuvnna báikkálaš ossodaga stivralahtuin. Seammá guoská organisašuvnnaide mat leat registrerejuvvon Sámedikkis maŋŋá ovddit sámediggeválgga (gč. § 28 d).
Eaŋkillistta bidjan válgabiirres
Jos organisašuvdna ii leat registrerejuvvon sámepolitihkalaš organisašuvdnan, de lea liikká vejolaš searvat sámediggeválgii jos bidjá listta man leat vuolláičállán unnimusat 30 olbmo geat leat Sámedikki jienastuslogus válgabiires.
Movt geavahusas bidjat listaevttohusa?
Dasa lassin mii lea namahuvvon bajábealde galgá listaevttohusas:
•· leat bajilčálan bellodaga/organisašuvnna namma
•· namahuvvot ahte lista guoská sámediggeválgii
•· evttohasat sáhttet leat dušše ovtta sámediggeválgalisttas
•· evttohasain galgá leat ovdanamma, goargu ja riegádanjahki, vejolaččat maiddái virgi ja ássansadji
•· oktasaš listtain sáhttá maiddái bidjat dieđuid evttohasa gullevašvuođas
•· leat unnimusat 40 proseantta ovddastus goappašiin sohkabeliin
•· luohttámušolbmo ja várreovddasteaddji namma sin gaskkas geat leat čállán vuollái listaevttohusa
•· diehtu das geat doibmet luohttámušlávdegoddin
•· galget leat unnimusat ovcci evttohasa nama válgabiirres. Válgabiirret main leat gaskal guokte ja njeallje mandáhta, galget bidjat ovcci evttohasa nama listaevttohussii. Jos válgabiirres leat vihtta dahje eanet mandáhtat, de sáhttá evttohasaid lohku ollásit leat guovttegeardán.
Jagi 2013 listaevttohusat - man ollu evttohasat listtas
Válgabiire 1 Nuortaguovllu válgabiire : 9 - 12 evttohasa (válgabiirres leat 6 mandáhta)
Válgabiire 2 Ávjovári válgabiire: 9 - 18 evttohasa (válgabiirres leat 8 mandáhta)
Válgabiire 3 Davveguovllu válgabiire: 9 - 12 evttohasa (válgabiirres leat 5 mandáhta)
Válgabiire 4 Gáiseguovllu válgabiire: 9 - 12 evttohasa (válgabiirres leat 6 mandáhta)
Válgabiire 5 Viesttarmeara válgabiire: 9 - 10 evttohasa (válgabiirres leat 4 mandáhta)
Válgabiire 6 Åarjel-Saepmie veeljemegievlie: 9 evttohasa (válgabiirres leat 4 mandáhta)
Válgabiire 7 Lulli-Norgga válgabiire: 9 evttohasa (válgabiirres leat 6 mandáhta)
Áigemearri buktit listaevttohusa lea cuoŋománu 2. b. válgajagi 2013. Diet áigemearri lea joavdanáigi. Listaevttohus lohkkojuvvo leat buktojuvvon dalle go dat lea joavdan Sámediggái.
Eambbo dieđuid Sámediggeválgga 2013 birra, váldde oktavuođa ráđđeaddiin Roald Andreas Sandvik tlf: 78474183