Daid ollu boazovuddjomiid geažil Nordlandsbanen alde lea Sámediggi bivdán dollojuvvot čoahkkima Johtolatdepartemeanttain ja stáhtaráđiin Magnhild Meltveit Kleppain. Čoahkkin dollojuvvo Oslos, vuosárgga miessemánu 21.b.
- Juohke jagi goddojuvvojit dohkketmeahttun ollu bohccot Nordlandsbanen alde ja mii leat sakka fuolastuvvan guovllu boazodoalu dihtii jus eai čađahuvvon doaibmabijut dalán dán guovllus. Jernbaneverket lea stáhtabušeahtas ožžon olles 60 miljon ruvnno uhcidan dihtii fuođđovuddjomiid. Dál lea áigi boahtán dasa ahte dát ruđat geavahuvvojit, cealká sámediggeráđđi Ellinor Marita Jåma.
Sámediggi lea ovttaoaivilis guovllu boazodoaluin ja Nordlándda fylkkamánniin, Hill Marta Solbergain, ahte ferte cegget áiddiid, juoga mii lea hui bures lihkostuvvan Ruoŧas.
- Trafikkverket Ruoŧas lea meroštallan ahte áiddit oktan jahkásaš divodemiiguin vuolidit boazovuddjomiid sullii 80 proseanttain. Otná beaivvi rádjai lea áidojuvvon 126 miilla guhkkosaš ruovdemáđiigaska Ruoŧas, in ge mun de ádde manne Norggas eai nagot áidut 70 miilla, cealká sámediggeráđđi Ellinor Marita Jåma.
Servodatváttisvuohta
- Boazovuddjomat Nordlandsbanen alde lea servodatváttisvuohta maid mii fertet čoavdit farggamusat. Ii leat dušše dat ahte vuddjomat dagahit ahte ollu eallit gillájit, muhto dat buvttiha maiddái stuorra dearvvašvuođagillámuša boazodolliide mat oidnet ahte togat njulgestaga sihkastit sin birgenlági eret, cealká sámediggeráđđi Ellinor Marita Jåma.
Jåma deattuha ahte lihkosivuođat Nordlandsbanen alde vásihuvvojit hui stuorra noađđin ovttaskas boazoeaiggádii, gii lassin dasa ahte ferte gieđahallat ieš dan lihkohisvuođa – sihke psykalaččat ja ekonomalaččat, muhto geasa maiddái dávjá biddjojuvvo ovddasvástádus das ahte ii leat nagodan doallat bohccuid eret ruovdemáđii.
- Sámediggeráđi mielas dát dilli lea dohkketmeahttun ja bivdá danne Johtolatdepartemeantta ja Jernbaneverket álggahit doaibmabijuid dalán nu ahte áidojuvvo Nordlandsbanen guora. Dát lea min miela mielde stáhta ovddasvástádus, cealká sámediggeráđđi Ellinor Marita Jåma.
Jåma čujuha loahpas dasa ahte nationála johtolatplána áigumuš lea ođasmahttit linnjafierpmádaga vai gálvo- ja olmmošjohtolat buorrána Nordlandsbanenis.
- Eanet johtolat, almmá áiddiid haga, sáhttá mielddisbuktit eanet boazovuddjomiid. Dat fas lasiha boazodoalu massimiid ja stuorruda stáhta buhtadusmáksimiid. Dál berrešii jearrat ii go leat servodatekonomalaš oainnu mielde buoret geavahit ruđaid áiddiide, go buhtadusaide, cealká ráđđelahttu Ellinor Marita Jåma.
Gulahalli:
Ráđđelahttu Ellinor Marita Jåma, tlf. 916 13 460