Sámediggi áigu duorastaga ođđajagimánu 14. b. čađahit politihkalaš konsultašuvnnaid Dálkkádat- ja birasdepartemeanttain mearraluosa hálddašeamis. Sámediggeráđđelahtu Silje Karine Muotka váldá fárrui sihke fágalaš veahki Sámi allaskuvllas ja ealáhusa ovddasteaddji čoahkkimii.
-Dál lea duođai áigi ahte ráđđehus guldala mii mis lea dadjamuš mearraluossabivddu bivdoáiggiid birra. Mii leat bargan badjel gávcci jagi dáinna proseassain, ja bivdoáiggiid gáržžideapmi dán áigodagas lea oalát dohkketmeahttun danne go dat earret eará dagaha dan ahte dákkár bivdui šaddá veadjemeahttun ođđasis rekrutteret, dadjá Muotka.
Lávga gulahallan mearraluossabivdiiguin
Čakčat 2015:s čohkkii Muotka buot mearraluossabivdoaktevrraid oktasaš čoahkkimii.
-Dalle soabaimet mii oktasaš oainnu mearraluossabivdoreguleremiid birra, ja mis lea dál oktasaš vuordámuš ahte juoga dáhpáhuvvá. Mii háliidit bivdoáiggi viiddideami min oktasaš cealkámuša mielde, dadjá sámediggeráđđi Silje Karine Muotka.
-Mii leat soahpan ahte mii galgat čađahit luossaresurssaid hálddašeami bures, muhto mearraluossabivdit leat ožžon eahpegovttolaš bivdogáržžidemiid, ja jagi 1994 rájes leat luossabivdosajiid lohku mat leat geavahusas eanet go beliin geahppánan. Dát mearkkaša maiddái dan ahte luossaresurssaiguin ávkkástallan lea garrasit futnon, dadjá Muotka.
Deaŧalaš bivdu mearrasámiide
-Dáláš reguleremiid geažil lea measta veadjemeahttun bargat mearraluossabivdoealáhusain. Dán ferte ráđđehus maiddái áddet. Ráđđehusa ovddasvástádussii gullá maiddái dat ahte mearrasámi kultuvrras galgá leat ávnnaslaš kulturvuođđu, dadjá sámediggeráđđi Silje Karine Muotka.
Eanet dieđuid addá: Sámediggeráđđi Silje Karine Muotka, 984 87 576