Norutrapport_2012_6r.pdf 992,77 kB
Sámi giellaguovddážat leat deaŧalaš ásahusat. Dat leat mielde nannemin gelbbolašvuođa sámi gielas ja kultuvrras, ovddidit giellaarenaid, ja sáhttet leat mielde ovddideamen sámi álbmoga identitehta iežaset guovlluin. Dan čájeha árvvoštallan maid Norut Alta – Áltá lea čađahan Sámedikki ovddas.
Sámedikki mihttomearri giellaguovddážiid várás lea ahte sámi giella galgá gullojuvvot ja oidnot giellaguovddážiid doaibmaguovllus. Dan iskkadeamis mo sámi giellaguovddážat ollašuhttet dán mihttomeari, lea dát árvvoštallan geahčadan sihke juohke giellaguovddáža siskkáldas dili, ja mo dat doibmet ovttas iežaset sierranas birrasiiguin ja Sámedikkiin.
10 giellaguovddáža
Árvvoštallamis ledje mielde 10 giellaguovddáža mat leat ožžon doarjaga Sámedikkis. Giellaguovddážat leat Unjárggas, Deanus, Porsáŋggus ja Álttás Finnmárkkus, Gáivuonas, Romssas ja Loabágis Romssa fylkkas, Evenášis ja Divttasvuonas Nordlánddas ja Rørosas Lulli-Trøndelagas.
Dát logi giellaguovddáža leat ásahuvvon iešguđet áigodagas, ja leat ovdánan iešguđet láhkai iešguđet sámi birrasiin. Muhtun báikkiin leat giellaguovddážat integrerejuvvon oassin sámi báikegottiin, eará sajiin daid sáhttá atnit “sámi suolun” dáža eanetlohkoservodagas. Dat mearkkaša ahte hástalusat dan oktavuođas ahte nannet sámegiela, lea iešguđet láhkai guovllus guvlui. Giellaguovddážiin leat iešguđet hástalusat sihke organiserema ja ekonomalaš resurssaid ektui ja ektui ahte háhkat bargiid geain lea gielalaš ja báikkálaš gelbbolašvuohta, čájeha árvvoštallan.
Evttoha máŋga doaibmabiju
Norut Alta – Áltá evttoha máŋga doaibmabiju buoridan dihtii giellaguovddážiid bargodili. Okta doaibmabijuin lea lasihit doaibmaruhtadeami ja ásahit giellakurssaid bistevaš ruhtadeami. Dat dagahivččii álkibun háhkat ja doalahit bargiid geain lea alla giellagelbbolašvuohta. Giellaguovddážat sáhttet maiddái eanet deattuhit dan ahte čohkket dan árbedieđu mii ain gávdno guovllus. Norut Alta evttoha maiddái ahte giellaguovddážat galget boahtit buorebut oidnosii sámi birrasiid olggobealde. Sii sáhttet fállat kurssa sámi gielas ja kultuvrra iežaset guovllu eará joavkkuide.
Ovddidit giellaguovddážiid viidáseappot
-Sámediggeráđđi áigu, gulahaladettiin iešguđet giellaguovddážiiguin, geahčat guđe vejolašvuođaid ja dárbbuid ferte vuhtiiváldit viidáset barggus ovddideamen giellaguovddážiid rolla boahtteáiggis, dadjá ráđđelahttu Ellinor Marita Jåma.
Eanet dieđut: Norut Alta – Áltá as prošeaktajođiheaddji Vigdis Nygaard. Su deaivvat telefovnnas 78 45 71 00 dahje ráđđelahtu Ellinor Marita Jåma telefovnnas 916 13 460.
Norutrapport_2012_6r.pdf 992,77 kB