Giellakampánjja birra
Sámegiella lea min máttuid skeaŋka midjiide. Skeaŋka man mii fas galgat addit iežamet maŋisbohttiide. Giella muitala juoidá das geat mii leat, ja nanne min gullevašvuođa sámi oktasašvuhtii. Eai buot sámi mánát ja nuorat leat beassan oahppat sámegiela, muhto sámegiella lea sidjiide maiddái deaŧalaš. Vaikko ieža eai máhte ge sámegiela, de lea gielas almmotge stuora mearkkašupmi maiddái sidjiide. Danne go gielas lea mearkkašupmi identitehta ja gullevašvuođa hárrái; dasa ahte sáhttit ovdanbuktit iežas jurdagiid, gulahallat ja dovdat gullevašvuođa stuorit oktavuhtii.
Sámediggi atná deaŧalažžan nannet, ovddidit ja seailluhit sámegiela buot sámi guovlluin. Sámediggi háliida ahte buot mánát ja nuorat galget beassat oahppat sámegiela doppe gos ásset, ja ahte sis galgá leat vejolašvuohta geavahit iežaset sámegiela beaivválaš eallimis. Sámediggi bargá dan ovdii ahte mánát ja nuorat miehtá riikka galget beassat oahppat sámegiela skuvllas. Mii háliidit ahte eanebut galggaše oahppat sámegiela, go dušše dainna lágiin sáhttit mii sihkkarastit ahte giella eallá viidáseappot ja ahte boahtte buolvvat maiddái beasaše oahppat sámegiela. Mii háliidit maiddái ahte eanebut sámástit nu dávjá go vejolaš, ja eandalii buotlágan oktavuođain. Sámedikki mielas galggašii leat lunddolaš sámástit sihke gávppis ja spábbačiekčamis, ja nu maiddái skuvllas. Mii háliidit sámegiela oidnot sosiála mediain. Mii háliidit ahte sámegiella gullo gáhtain, mehciin ja skuvlašiljuin.
Danne lea sámediggi álggahan giellakampánja “Sámás muinna”. Mii sávvat ahte dát kampánja galggašii boktit dihtomielalašvuođa dasa ahte geavahit sámegiela eambbo oktavuođain, movttiidahttit oahppat sámegiela, lasihit sámegiela geavaheami eambbo ja ođđa arenain ja oktavuođain, ja ahte sámegiella geavahuvvošii almmolaš oktavuođain.
”Sámás muinna” lea riikkaviidosaš movttiidahttinkampánja mii fátmmasta buot sámi nuoraid, sihke sin geat máhttet sámegiela, geat máhttet veahá ja sin geat eai máhte sámegiela.
Áŋgiruššama ulbmil lea váikkuhit dasa ahte:
- sámegiela geavaheapmi lassána
- eanebut sámástišgohtet
- sámegiella geavahuvvo eambbo arenain ja oktavuođain
- sámegiella čalmmustahttojuvvo
- servodagas lassána ipmárdus dasa man deaŧalaš midjiide lea beassat iežamet giela geavahit
Min áigumuš lea oažžut olbmuid válljet sámegiela. Sámegiela boahtteáigi lea dan duohken ahte juohke okta mis atná sámegiela lunddolaš gulahallangiellan eanemus vejolaš oktavuođain, ja ahte eanebut háliidit ja duođai barget dan ala ahte oahppat sámegiela.
Min oaidnu ja čuorvvas lea ahte sámegiella lea deaŧalaš ja ávkkálaš. Oahpa sámegiela, geavat sámegiela, vállje sámegiela! Mii leat buohkat mielde seailluheame sámegiela go geavahit dan. Lea maiddái deaŧalaš deattuhit ahte lea stuora ovdamunni leat guovttegielat, ja ahte dat addá buriid bargovejolašvuođaid boahtteáiggis.