Goassige ii šat 1990

Sámediggi lea duhtavaš go ráđđehus evttoha nannet riddo- ja vuotnabivdiid guolástusrivttiid odne ja boahtteáigái. – Dál mearriduvvo lága bokte ahte buohkain geat ásset Finnmárkkus, Davvi-Romssas ja mearrasámi guovlluin Romssas ja Norlánddas, leat guolástusrievttit. Dat mii dáhpáhuvai 20 jagi dás ovdal ii galgga šat goassige dáhpáhuvvat, dadjá Sámedikki presideanta Egil Olli.

Láhkaevttohusat leat boahtán maŋŋá badjel 20 jagi rahčamušaid dan ektui ahte sihkkarastit mearrasámi servodahkii vejolašvuođa birget árbevirolaš bivdduin.
Ráđđehus evttoha ahte reguleremiid oktavuođas galgá biddjojuvvot hui stuorra deaddu sámi geavahussii ja dan mearkkašupmái sámi báikegottiin. Lágas daddjojuvvo maiddái ahte báikkálaš guolásteddjiide gullá vuotnabivdu. Bivdu regulerejuvvo dainna lágiin ahte fatnasat mat leat badjel 15 mehtera eai oaččo bivdit vuonain.

-Mearrádusat guolástusrievttis, sámi guolásteddjiid deattuheapmi vuotnabivddu reguleremiid ja sihkkarastima oktavuođas, dagahit ahte stáhta ii goassige šat sáhte bidjat guolásteddjiid gáddái nugo dahkkojuvvui 1990-logus, dadjá Sámedikki presideanta Egil Olli.

Báikkálaš hálddašeapmi

Ráđđehus evttoha ahte ásahuvvo vuotnabivdolávdegoddi Finnmárkku, Romssa ja Norlándda várás. Lávdegoddi lea deaŧalaš ráđđeaddi riikka eiseválddiide ja nanne báikkálaš váikkuhanfámu guolástusa hálddašeapmái. Guolástus- ja riddodepartemeanta ja Sámediggi galget konsulteret vuotnabivdolávdegotti bargosuorggi ja válddi birra.

Kártejuvvojit

-Láhkarievdadus mii boahtá lea mearkkašahtti lávki sámi ja riddolagaš bivddu einnostanvejolašvuođa ja birgenvejolaš rámmaid sihkkarastima ektui. Soaitá ahte dát maid leat ožžon ii leat sámerievttálaččat gal nu hirbmat stuorra olahus. Guolástusvuoigatvuođa prinsihpalaččat dohkkeheapmi historjjálaš geavaheami vuođul ii leat evttohuvvon láhkii čadnojuvvot, muhto Sámedikki oaidnu boahtá čielgasit ovdan láhkaevttohusa ovdabargguin, dadjá Sámedikki presideanta Egil Olli.

Sámedikki presideanta Egil Olli dadjá ahte ođđa láhkaaddimiin dohkkehuvvo guolástusvuoigatvuohta historjjálaš geavaheami vuođul. Danne go Finnmárkku kommišuvdna galgá kártet bivdosajiid vuoigatvuođagáibádusaid. Láhkaevttohusa maŋŋá lea stáhtas ovddasvástádus kártet oktasaš ja individuála historjjálaš bivdovuoigatvuođaid.

-Riddoguovllus dilli šaddá rievdat hui ollu. Ođđa láhka ii leat doarvái. Eret fárrema sáhttá bissehit dušše dan bokte ahte eiseválddit álggahit doaibmabijuid mat buktet doaivaga ja jáhku boahtteáigái. Ruđaid ferte várret infrastruktuvrii, investeremiidda ja rekrutteremii, dadjá Olli.

Dá lea ráđđehusa preassadieđáhus

Dá lea láhkaárvalus

Oktavuohtadieđut Egil Olli, tlf. 900 26 880

President NSR Ávjovárri

Aili Keskitalo

Phone: +47 971 29 305 aili.keskitalo@samediggi.no