![](/share/icons/crystal/16x16/mimetypes/pdf.png)
Sámegieloahpaheaddji ja dutki Mikael Svonni, girječálli Kerttu Vuolab ja nuortalašgiela oahpaheaddji Seija Sivertsen ožžot dán jagáš Gollegiellabálkkašumi
Sámediggepresideanta Aili Keskitalo ja gieldda- ja ođasmahttinministtar Jan Tore Sanner lihkuheaba bálkkašumi vuitiid.
-Dán jagi golbma Gollegiella vuoiti leat leamaš mielde ja leat ain mielde nannemin sámegiela. Vuoitit leat iešguđetge ládje bargan sámegiela ovddas. Sii leat buorit ovdamearkkat midjiide buohkaide geat beroštat sámegielas, dadjá gieldda- ja ođasmahttinministtar Jan Tore Sanner.
Giellabálkkašumi leat ásahan sámeáššiin vástideaddji ministarat Norggas, Ruoŧas ja Suomas ovttas dáid riikkaid sámediggepresideanttaiguin. Gollegiela - davviriikkalaš sámi giellabálkkašumi ulbmilin lea gáhttet, ovddidit ja seailluhit sámegiela Norggas, Ruoŧas, Suomas ja Ruoššas. Bálkkašupmi geigejuvvo juohke nuppi jagi ja juhkkojuvvui vuosttaš geardde jagi 2004. Bálkkašumi sturrodat lea 15 000 euro.
-Sámegiella lea riikkaid váldogielaid deattu vuolde. Sámegiela boahtteáigi lea dan duohken ahte giella geavahuvvo ja oidno davviriikkain, ja danne lea davviriikkalaš giellaovttasbargu dehálaš sihkkarastin dihte sámegiela boahtteáiggi. Gollegiellabálkkašupmi galgá leat mielde loktemin sámegiela árvvu, ja mii sávvat ahte vuoitit ain barget viidásat sin dehálaš bargguid, lohká Sámedikki presideanta Aili Keskitalo.
Pekka Sammallahti lea Gollegiella árvvoštallanlávdegotti ságajođiheaddji.
Árvvoštallanlávdegoddi čállá iežas ákkastallamis earret eará:
Mikael Svonni oažžu Gollegiellabálkkašumi guhkesáigásaš barggustis davvisámegiela buorrin Ruoŧa bealde. Svonni lea ovddidan davvisámegiela máŋgga ládje ja su giellabarggut leat leamaš earenoamáš dehálaččat davvisámegiela ovddideapmái Ruoŧa bealde.
Kerttu Vuolab oažžu Gollegiellabálkkašumi guhkesáigásaš barggustis davvisámegielat čáppagirjjálašvuođa ovddideaddjin. Árvvoštallanlávdegoddi oaidná Vuolab ánsun earenoamážit davvisámegiela sátneriggodaga seailluheamis ja ovddideamis.Seija Sivertsen ánssáša Gollegiellabálkkašumi eallinbarggus nuortalaš giela, kultuvrra ja servodaga buorrin.
Gollegiellabálkkašumi geigen dáhpáhuvai davviriikkalaš ministtar- ja sámediggepresideanttaid čoahkkimis Helssegis bearjadaga 21.11.14
Eanet dieđut:
Samediggepresideanta Aili Keskitalo, + 47 971 29 305
Mielddusin: Gollegiella-árvvoštallanlávdegotti ákkastallan