Go Sámedikki politihkkárat deaivvadit dievasčoahkkimii golggotmánu 6. – 10.b., lea gonagasreabbábivddu bivdin- ja hálddašanproseassat okta dain áššiin mat galget meannuduvvot.
Dat fáhkka láhkaásahusrievdadusat gonagasreabbábivddus loahpageahčen suoidnemánu, mat gilde vuollel 6 mehtera fatnasiid bivdimis gonagasreappáid, leat duođaid dahkan áigeguovdilin digaštallama ahte guđe prinsihpat galget gustot, muitala sámediggeráđđi Silje Karine Muotka
- Departemeanta lea dieđihan ahte hálddašeapmi galgá guorahallojuvvot dievaslaččat boahtte jagi, ja danne mii háliidit ahte Sámediggi galgá leat ovddabealde ja defineret guđe prinsihpaid mii doarjut, muitala Muotka, gii vuordá stuorra doarjaga uhcimus fatnasiidda, mat dávjá ožžot dietnasa reabbábivddus lotnolasat eará ealáhusaiguin
Sámediggeráđi mearrádusevttohusas čuožžu earret eará ahte ii galgga fanassturrodahkii biddjojuvvot vuolimus rádji, ja ahte lea deaŧalaš joatkit dan prinsihpa ahte sii geaidda reabbá lea vahágin, galget oažžut ávkki reabbábivddus.
- Dain signálain maid guolástusministtar lea addán dán rádjai, ii oro leamen nu ahte son berošta dain váikkuhusain mat láhkaásahusrievdadusain leat sidjiide geat ásset rittuin. Politihkka lea mielde goarideamen mearrasámi ealáhus- ja kulturvuđđosa, oaivvilda Muotka viidáseappot
Guolástusministtar Elisabeth Aspaker boahtá Sámediggái dievasčoahkkinvahkus Sámedikki 25-jagi ávvudeapmái
- Lean ilus go son boahtá Sámediggái, ja doaivvun son astá guldalit digaštallama dievasčoahkkinlanjas. Gonagasreabbábivdu lea deaŧalaš Sámediggái ja sámi servodahkii, ja jáhkán ministara ipmirdit dan go son guldala digaštallama, loahpaha Muotka.
Gulahalli:
Ráđđelahttu Silje Karine Muotka, tel. 984 87 576