Disdaga cuoŋománu 29.b. deaivvada Sámediggeráđđi Henrik Olsen Servodatsihkarvuođa- ja gearggusvuođadirektoráhta ovddasteddjiiguin, 110- guovddážiin Hámmárfeasttas, Romssa ja Sálttu suohkaniiguin ja suohkaniiguin sámegiela hálddašanguovllus. Čoahkkima fáddá lea sámi heahtedieđihanbálvalus.
- Lea stuora váttisvuohta ahte sámegielat dieđiheaddjit heahteguovddážiidda eai ipmirduvvo, dahje ahte sámegielat báikenamat ipmirduvvojit boastut nu ahte buollinčáskadeaddjit sáddejuvvojit boasttu čujuhussii. Dát lea mielddisbuktán eahpesihkarvuođa álbmogii, ja dovdo riskan heggii ja dearvvašvuhtii, lohká sámediggeráđđi Henrik Olsen.
Nu go Sámediggi oaidná, de ii doaimma heahtedieđiheapmi ja dieđiheapmi muđui doarvái bures sámegielat geavaheddjiide, nu guhká go ii leat vejolaš dieđihit sámegillii, dahje ahte dieđiheapmi mielddisbuktá eanet áigegeavaheami gaskal dieđiheami ja olggosvuoddjáma.
Hástaleaddji bargu
Disdatčoahkkimis suohkaniiguin ja heahteguovddážiiguin lea iešguđet aktevrrain vejolašvuohta ovdanbuktit hástalusaid ja vejolaš doaibmabijuid sihke 100- guovddáža bealis ja suohkaniid bealis.
- Midjiide lea dehálaš ahte gávdno našunála gearggusvuohta mii maid duste sápmelaččaid dárbbu ja vuoigatvuođaid. Lea dehálaš sihkkarastit dohkálaš ja buori bálvalusa sámi álbmogii, lohká Henrik Olsen.
Son mieđiha ahte dát sáhttá leat hástaleaddjin.
- Ásaheapmi ja doaimmaheapmi buollin- ja gádjunbálvalusain, ja heahtedieđihanbálvalusat, leat suohkaniid ovddasvástádus, ja buot orro čájeheame ahte ná boahtá maid leat boahtteáiggis. Dat mielddisbuktá ahte heahteguovddážat maidda gullet suohkanat sámegiela hálddašanguovllus, leat geatnegahtton váldit vuostá sámegielat dieđiheddjiid. Heahtedieđihanbálvalusa organiseren boahtteáiggis ferte maid váldit vuhtii dán, vaikko orro leame hástaleaddji bargun
Oktavuohtaolmmoš:
Sámediggeráđđi Henrik Olsen, tlf. 907 75 219