Sámediggi áigu mearridit ođđa dieđáhusa ealáhusovddideami birra 2019 čakčamánus. Okta váldosivain dasa ahte ođđa ealáhuspolitihkka ferte ráhkaduvvot lea ahte doaibmaguovlu lea menddo viiddis bušeahta ektui. Maid Sámediggi ferte mearridit lea ahte galgá go doaibmaguovlu 31 gielddain heaittihuvvot, galgá go unniduvvot dahje lea go ealáhusat mat eai galggašivčče oažžut doarjaga ealáhusovddideapmái. Sámediggi lea earret eará árvvoštallan eanet deattuhit sámi kultuvrra ealáhusovddideamis dan ođđa politihkkas eará ealáhusaid sadjái.
Dan rájes go maŋimuš dieđáhus bođii 2011:s de leat rievdadusat leamaš ealáhuseallimis, mii dagaha ahte lea dárbu ođđa ealáhusstrategiijaide. Mii maid oaidnit ahte olbmot fárrejit eret sámi guovlluin, mas erenoamážit nuorat fárrejit.
Ealáhusdieđáhus barggu oktavuođas lea Sámedikkis gulaskuddan Sámedikke ealáhuspolitihka rievdadeami birra. Áigemearri sáddet evttohusaid lea vuossárgga 17.06.19.
Masa háliidat evttohusaid lea čuovvovaččat:
- Rámmaeavttuid buorideamis leat dávjá guhkitáigge bistevaš váikkuhusat ealáhuseallimii. Mo berrešii Sámediggi vuoruhit dán barggu doarjjahálddašeami ektui?
- Mo berre Sámediggi rievdadit iežas doarjjaortnegiid go doaibmaguovlu lea menddo stuoris doarjagiid ektui? Makkár guovllut sáhtášedje vuoruhuvvot vuollelii?
- Makkár geográfalaš guovlluin (gávpogiin, sámi guovlluin jna) ja ealáhusain lea dárbu doarjjaortnegiidda?
- Mo galgá kapitáladárbbu gokčat sidjiide geat háliidit ásahit ođđa ealáhusdoaimmaid sámi guovlluin?
- Sáhttá go kulturvuđot ealáhusovddideapmi sihkarastit doarvái positiiva ealáhusovddideami sámi guovlluin?
- Mii ferte leat sajis oažžun dihtii nuoraid ásahit bargosajiid sámi guovlluin?
Evttohusaid sáhtát sáddet deike: naeringsmelding@samediggi.no.
Gulahallanolmmoš: Fágajođiheaddji John Osvald Grønmo, tlf 78 47 41 86