Sámediggeráđđi Silje Karine Muotka oaivvilda ahte rievdadusevttohusain maid Tveterås-lávdegoddi odne ovddidii leat hui stuorra ja duođalaš váikkuhusat guolástusaide Norggas.
-Mun registreren ahte Tveterås-lávdegoddi odne lea evttohan stuorra rievdadusaid mat oktiibuot billistit guolástusvuođu dán riikkas, dadjá Muotka.
Son oaivvilda ahte dát lea dramáhtalaš mearrasámi guolástussii.
-Dát evttohusat sáhttet ollásit goaridit mearrasámi kultuvrra, dadjá Muotka. Son oaivvilda dán rihkkut sihke vuođđolága, mearraresursalága ja oasseváldilága prinsihpaid.
-Norgga eiseválddiin leat čielga geatnegasvuođat mearrasámi kulturvuođu sihkkarastimis ja suodjaleamis boahtteáiggis, dadjá Muotka, ja son vuordá ahte dahkkojuvvo váikkuhusiskančielggadus das maid Tveterås-lávdegotti evttohus dagahivččii mearrasámi báikegottiide.
- Riddoguolástuskompromissa ektui lea dát hui stuorra lávki maŋos guvlui jos bealli lávdegotti evttohusain čađahuvvoš, dadjá Muotka. Son oaivvilda dál ahte sihke ráđđehus ja Stuorradiggi fertejit váldit čielgaseappo ovddasvástádusa guolástusvuoigatvuođaid dohkkeheamis ja guolástusa sihkkarastimis riikka guolástussorjavaš servodagas miehtá rittu.
-Sámediggi áigu gižžudit dan ovdii ahte vuođđu bisuhuvvošii sihke varasguollelága ja oasseváldilága olis. Jos addá lobi vuovdit guolástuseriid čanakeahttá daid bivdofatnasii, de rihkku dat prinsihpaid bivdioamastan fatnasiin, ja lea njuolga áitta mearrasámi guovlluide. Mis lea iešheanalis riektevuođđu, dadjá sámediggeráđđi.
Loahpas čujuha son Riddoguolástuslávdegotti ovttajienalaš áššidovdilávdegoddái. Dán eai sáhte eiseválddit badjelgeahččat – guolástusat leat leamaš ássanvuođđun vuotnagáttiin ja miehtá rittu. Mis lea dál ja boahtteáiggis guolástusvuoigatvuohta, ja dan ferte ráđđehus gudnejahttit ja dohkkehit.