Sámedikki várrepresideanta Laila Susanne Vars oaččui njukčamánu 21.beaivvi gullát Romssá Universitehta ođđa masteroahppofálaldaga birra mii lea heivehuvvon sidjiide geain ii leat sámegiella eatnigiellan. Seamma beaivvi deaivvadii rektorin Jarle Aarbakkiin oažžundihte dieđuid Finnmárkku Allaskuvlla ja Romssá Universitehta oktičaskima birra. Vars maid buvttii dieđuid Aarbakkii Sámedikki alit oahpahusa ja duŧkama áŋgiruššáma birra.
- Šadden ilus go gullen ahte rektor nu čielgasit deattuha ođđa universitehta sámi profiila ja ahte ain dáhkida ahte Universitehtas lea sámi duŧkan ja alit oahpahus ain okta váldoovddasvástádussurggiin. Luohtán sunnje go dadjá ahte oktičaskin Finnmarkku Allaskuvllain boahte nannet Universitehta sámi fálaldagaid ja sihkkarastet ahte mii ain boahtteáiggis oažžut olu allaoahppan sápmelaččaid ja sámegielagiid, juristtaid, oahpaheddjiid, dearvvašvuođabargiid ja eará fágabargit geat gárvvistit oahpuset Universitehtas. Riikadásis lea ain heahtedilli go mis eai leat doarvái sámegielat fágabargit, dadjá Sámedikki várrepresidenta Laila Susanne Vars
Borgemánu 1. Beaivvi 2013 galga ođđa Árkatalaš Universitehta rahppot, ja Romssá Universitehta ja Finnmárkku Allaskuvla leaba de oktiičaskojuvvon.
Sámediggi lea bargamin Ráđđehusa duŧkandieđáhusa čuovvolemiin, ja dasa lassiin vel Butenschønlávdegotti árvalusaid čuovvolemiin. Dáid bargguid olis, de lea Sámediggeráđđi bovden čoahkkimii Bådåddjos cuoŋománu 3. ja 4.beivviid gos fáddá lea justefal sámi alit oahpahus ja duŧkan. Jearaldat lea mot lea dilli odne ja makkar hástalusat ja vejolašvuođat leat boahtteáiggis, ja mainna lágiin mii galgat oazzut eanet sámi nuoraid oahpu háhkat.
- Mus lea sávaldat ahte Sámediggi ja ođđa Árktalaš Universitehta gulahallaba buorebut, ahte mii sáhtašeimmet juogadit dieđuid ja dávjjibut gulahallančoahkkimiid doallat. Sámediggi dovdá bures sámi servvodaga ja dárbbuid mát leat sámi servvodagas, sihke suohkaniin ja sámi ásahusain. Mis leat sierra stipeandaortnegat mat galggaše movttidahttin nuoraid háhkat oahpeheaddji dahje sámegieloahpu alit dásis. Romssá Universitehta lea hui dehalaš ovttasbargoguoibmi dán oktavuođas vai mii nagodivččiimet servvodaga dárbbuide vástidit, dadjá Laila Susanne Vars.
Ráđđehusa duŧkandieđáhus almmuhuvvui njukčamánu 8.beaivve, das namuhuvvojit maid bajit dási politihkalaš mihtut sámi duŧkama hárrái. Kristin Halvorsen ja Sámedikki várrepresidenta leaba dál álggahan Butenschønlávdegotti evttohusaid čuovvolanbargguid. Earet eará lea ovttaoaivilvuohta gaskkal Sámedikkeráđi ja ministara dasa mii guoská sierra ovttasráđi ásaheapmái daidda ásahusaide geat fállet sámi alit oahpahusa. Ođđa ráđđi galgá Universitehta ja Allaskuvllaid Ráđi struktuvrra siskkobeallái ásahuvvot. Dasa lassiin ferte sámegiella duŧkangiellan nannejuvvot ja maiddái gaskkusteapmi ja sámi duŧkiidfierpmádat nannejuvvot.
- Oahpahusásahusat davvin geat fállet sámi oahpahusa, sis lea hui guovddáš sadji dál go ráđđehus áigo nana davviguovllopolitihka fievrredit. Davviguovllo regiuvdna dárbbaša allaoahppán olbmuid jus mii galgat birgehallat buot dásiguin davviguovllopolitihkas. Mun ávžžuha ásahusaid nannet ovttasbargguset, vai mii ieža nagodit gelbbolašvuođa nannet ja ovddidit iežamet eavttuid vuođul. Davvi- Norga ferte iešbirgejeaddji gelbbolašvuođa ektui , ja Sámediggi hálida leat veahkkin nannemis gulahallama ásahusaid gaskka geat fállet sámi oahpahusa alit dásis, loahpaha Sámedikki várrepresideanta Laila Susanne Vars.