Dovddat go gean ge gii lea ovddidan dásseárvvu sámi servodagas? Su dahje sin háliida Sámei parlamentáralaš ráđđi gudnejahttit Davviriikkalaš sámi dásseárvobálkkašumiin.
- Sámi parlamentáralaš ráđi bealis bovden sámi organisašuvnnaid ja ásahusaid evttohit evttohasaid dán bálkkašupmái, dadjá presideanta Egil Olli.
- Bargu ovttadássásašvuođain ja dásseárvvuin gaskal nissonolbmuid ja almmáiolbmuid lea dávjá guhkesáiggi bargu masa gáibiduvvo sihke gierdevašvuohta ja duostilvuohta. Danne lea hui deaŧalaš čalmmustahttit ja gudnejahttit dán barggu, joatká Olli.
Bálkkašumi sáhttet oažžut ovttaskas olbmot, joavkkut, fitnodagat, organisašuvnnat, searvvit, skuvllat dahje eará almmolaš etáhtat mat leat bargan dakkár bargguid, dahje čađahan doaibmabijuid mat leat nannen ja ovddidan dásseárvvu geavatlaččat. Bálkkašupmi geigejuvvo dál nuppi geardde. Viđa jagi áigi oaččui Risten Rauna Magga dán bálkkašumi su barggu ovddas sámi gielain, sámi dearvvašvuođabálvalusain ja barggu ovddas eastadit gárrenmirkogeavaheami.
- Dáinna bálkkašumiin háliida Sámi parlamentáralaš ráđđi movttiidahttit eanet áŋgiruššamii ovttadássásašvuođain ja dásseárvvuin gaskal almmáiolbmuid ja nissonolbmuid riikkarájiid rastá sámi servodagas, dadjá Olli.
Sámi parlamentáralaš ráđi stivra mearrida ieš geat dat galget oažžut bálkkašumi. Dásseárvobálkkašupmi lea dáidda ja ruhtasupmi man árvu lea oktiibuot € 10 000,-. Bálkkašupmi geigejuvvo ”Menns liv i en samisk kontekst”-nammasaš konferánssas skábmamánu 1. b. Romssas.
Áigemearri evttohit evttohasaid lea golggotmánu 3. b. 2012.
Evttohusat sáddejuvvojit deike:
Sámediggi
Ávjovárgeaidnu 50
9730 Kárášjohka.
Dahje deike: samediggi@samediggi.no.
Gulahalli:
Presideanta Egil Olli, tel. 900 26 880.