Sámediggeráđđi lea bivdán konsultašuvnnaid Oahpahusdirektoráhtain (Odir) dan birra ahte loahpahit dan ortnega ahte stáhtalaš sámi joatkkaskuvllain Kárášjogas ja Guovdageainnus lea sierra stáhtalaš stivra. Sámediggeráđđi háliida diehtit mo Odir ja ráđđehusa leat jurddašan fuolahit daid bargamušaid, mat dálá stivrras leat, jus stivra loahpahuvvo.
-Sámediggeráđđi lea bivdán konsultašuvnnaid dán áššis go min miela mielde lea hui deaŧalaš ahte stáhtalaš sámi joatkkaskuvllaide sihkkarastojuvvo einnostahtti ja oadjebas boahtteáigi ja dohkálaš ja ovddasvástideaddji hálddašeapmi. Máhttodepartemeantta plolitihkalaš njunnošat leat munnje dáhkidan ahte stáhta joatká hálddašit dan guovtti sámi joatkkaskuvlla, mat mis leat dál go mii leat čielgasit dadjan ahte Sámedikkis ii leat vejolašvuohta váldit badjelasas hálddašeami, dadjá Sámeidikki várrepresideanta Laila Susanne Vars.
Sámediggi lea dan oahpahusdieđáhusas mii dohkkuvvui 2012 giđa, mearridan ahte Sámediggi ii oainne vejolašvuođa oamastit sámi joatkkaskuvllaid nu guhká go Sámedikki konsultašuvdnavuoigatvuohta bušeahttaáššiid ektui lea nu gárži. Sámedikki dieđáhusas oahpahusa ja oahpu birra, mii meannuduvvui dievasčoahkkimis 23.02.2012 áššis SP 007/12 daddjojuvvo:
Sámedikki oaidnu lea ge dasto ahte Sámediggi ii galgga váldit badjelasas Guovdageainnu ja Kárášjoga stáhtalaš joatkkaskuvllaid dahje eará skuvllaid hálddašeami, ovdal go Sámedikki rolla bušeahttaoktavuođas lea nannejuvvon ja ovdal go skuvllaid sámi oamasteapmái leat biddjojuvvon čielga rámmat. Sámedikki bargun lea váikkuhit ahte guovddáš eiseválddit sihkkarastet ohppiid dahje fidnoohppiid vuoigatvuođaid, láhkaásahusain nannet oamasteddjiid/hálddašeddjiid geatnegasvuođaid ja sihkkarastit sámi joatkkaoahpahussii ruhtadeami stáhtabušeahtas.
Konsultašuvnnat galget čađahuvvot Sámedikki mearrádusa vuođul áššis 08/08 Sámi joatkkaoahppu – hálddašanmodealla ja dan bargojoavkku raportta vuođul mas ledje lahtut Máhttodepartemeanttas (MD), Sámedikkis ja Oahpahusdirektoráhtas, mas lei namahus”De statlige samiske videregående skolene – vurdering av framtidig forvaltningsansvar”, geigejuvvo 2007 geassemánus. Raportta rávvagiin daddjojuvvo earret eará ahte dat ortnet ahte sámi joatkkaskuvllain lea sierra stáhtalaš stivrejupmi, galgá loahpahuvvot.
-Sámediggái lea deaŧalaš oažžut loahpalaš dáhkádusa direktoráhtas ja ráđđehusas ahte sámi joatkkaskuvllat galget bissut stáhtalažžan eai ge biddjojuvvot fylkkagielddalaš hálddašeami vuollásažžan. Lea hui buorre go dat proseassa ahte sihkkarastit sámi joatkkaskuvllaide buoret lanjaid, lea bures ovdánan, buorre oahppanbiras lea mearrideaddjin dasa ahte skuvllat galget ovdánit ja ahte sihkkarastojuvvo dássidit ohppiidlohku, dadjá Laila Susanne Vars.
Sámediggi lea 2008:s juo bivdán konsultašuvnnaid Máhttodepartemeanttain bargojoavkku raportta birra, almmá dan haga ahte ášši lea čuovvoluvvon departemeantta bealis. Dál lea Sámediggeráđđi sádden reivve MD politihkalaš njunnošiidda mas bivdojuvvo ahte Sámediggeráđđi konsulterejuvvon stáhtalaš sámi joatkkaskuvllaid stivrejumi birra.
-Stáhtalaš sámi joatkkaskuvllat leat áibbas deaŧalaččat dasa ahte sámi nuoraide sihkkarastojuvvo áidnalunddot oahppofálaldat joatkka dásis álgoálbmotperspektiivva vuođul, mii dahká vejolažžan gáhttet, ovddidit ja nannet sámegielaid, sámi kultuvrra ja servodateallima. Sámediggeráđi bealis mii háliidit ahte skuvllat galget nannejuvvot ja ahte daidda sihkkarastojuvvojit ovdánanvejolašvuođat. Sámediggi háliida váikkuhanvejolašvuođa earret eará daidda ulbmiliidda mat bohtet ovdan juolludusreivviin sámi joatkkaskuvllaide, mii livččiimet áigá juo galgan beassat fárrui dán bargui, dadjá Sámedikki várrepresideanta Laila Susanne Vars.
Sámediggeráđđi bivdá Oahpahusdirektoráhta bovdet Sámedikki politihkalaš konsultašuvnnaide dán ášši birra, ja čujuha dasa ahte 2005 mannosaš konsultašuvdnašiehtadus maiddái guoská direktoráhtii seamma láhkai go departementii ge.
Gulahalli Sámedikki várrepresideanta Laila Susanne Vars, 977 54 102