Sámediggedieđáhus sámi mánáidgárdefálaldaga birra lea válmmas. Dieđáhusas evttohuvvo earret eará ahte seamma láhkanannejuvvon vuoigatvuohta sámegieloahpahussii galgá maiddái gustot mánáidgárdái, nu go vuođđooahpahussii ge.
- Duohtavuohta lea ahte mánát háhket ođđa oahpu hui johtilit. Nappo galggašii vuoigatvuohta sámegieloahpahussii gustot maiddái min uhcimus mánáide ge, cealká várrepresideanta Laila Susanne Vars.
Son čilge viidáseappot ahte dakkár fálaldat sáhttá nannet sámegiela ja sámi kultuvrra erenoamážit doppe gos sámegiella ii leat beaivválaš giellan.
- Mánáide gávpotguovlluin, dahje ruovttuin gos dárogiella lea ruovttugiellan, sáhttá láhkanannejuvvon vuoigatvuohta oahppa sámegiela mánáidgárddis jo, movttiidahttit viidáset oahppamii.
Dieđáhusas evttohuvvo viidáseappot stuorra áŋgiruššan giellalávgunmánáidgárddiiguin, sámegielat fágabargiiguin ja buorebut heivehuvvon pedagogalaš oahpponeavvuiguin.
Vásihusat dakkár guovlluin gos leat geahččalan giellalávgunmánáidgárddiid, leat hui buorit go guoská guovttegielalašvuhtii ja minoritehtagiellaoahpahussii. Vai buoremus lági mielde beassá gáhttet ja ovddidit sámegiela, de mii háliidit ahte sámi mánát maid galget beassat ávkkástallat dakkár fálaldagain, cealká várrepresideanta Laila Susanne Vars.
Várrepresideanta Vars čilge ahte lea hástaleaddjin Sámedikki dálá doarjjavuogádaga ektui.
- Dákkár áŋgiruššama ii sáhte čađahit muđui go Sámediggi oažžu ruđaid dán bargui, dadjá Laila Susanne Vars.
Sámegielat fágabargit
Lea stuorra dárbu sámegielat mánáidgárdeoahpaheddjiide ja danne evttohuvvo Sámedikki 2013 bušeahtas joatkit dan ortnega mas addojuvvo erenoamáš oahppostipeanda mánáidgárdeoahpaheaddjistudeanttaide ja studeanttaide geat váldet alit oahpu sámegielas.
- Mii leat earret eará oaidnán ahte daid sámegielat gánddaid lohku, geat ohcet ovdaskuvlaoahpaheaddjiohppui, lea lassánan ja dat lea hui buorre, dadjá Sámedikki várrepresideanta Laila Susanne Vars.
Sámedikki várrepresideanta Laila Susanne Vars bidjá ovdan Sámedikki mánáidgárdedieđáhusa váldočuoggáid 13.11.2012 dii.12.20 Mánáidgárde- ja skuvlakonferánssas Romssas. Ášši meannuduvvo skábmamánu dievasčoahkkimis.
Sámediggi bovde preassa oassálastit. Ovdanbidjan dáhpáhuvvá Radisson Blu hoteallas Romssas.
Gulahalli:
Várrepresideanta Laila Susanne Vars, tel. 977 54 102.