Sámediggi háliida kártet veahkaválddi lagaš gaskavuođain sámi servodagain. - Veahkaváldi nissonolbmuid vuostá lea hástalussan maiddái min servodahkii. Dan mii diehtit, muhto mis leat uhccán dieđut dan birra mii dat lea mii vuolggaha veahkaválddi ja mo veahkkeapparáhta duste sin geas dás lea sáhka, dadjá ráđđelahttu Vibeke Larsen. Danne leat mii ovttas Justiisa- ja gearggusvuođadepartemeanttain almmuhan dutkanprošeavtta dán fáttás.
-Mii fertet duostat čalmmustahttit veahkaválddi sámi servodagain ja ságastallat dan birra. Veahkaváldi ii leat priváhtaášši. Veahkaváldi lea rihkolaš dahku, dadjá Larsen.
Uhccán dieđut
Leat uhccán dieđut veahkaválddi birra lagaš gaskavuođain sámi servodagain. Mis ii leat statistihkka ja dutkan Norggas mii muitala veahkaválddi dávjodaga birra ja mo guoskevaš etáhtat dustejit dán hástalusa.
Sámediggeráđđi lea viežžamin fálaldaga prošektii Veahkaváldi lagaš gaskavuođain sámi servodagain. Dáinna prošeavttain háliida Sámediggi kártet daid beliid sámi servodagain, mat váikkuhit veahkaváldái lagaš gaskavuođain. Dat sáhttet leat sámi servodagaid olggobealde dahje siskkáldas bealit. Dan oktavuođas lea almmáiolbmo ja nissonolbmo rolla sámi servodagain erenoamáš miellagiddevaš.
-Mii háliidit maiddái diehtit eanet dan birra mo sámi álbmogii lea álkit fuobmát veahkaválddi ja mo sáhttá buoremus lági mielde sámi álbmogii láhčit doaibmabijuid mat eastadit veahkaválddi ja dustejit dan váikkuhusaid, dadjá Larsen.
-Dáid dieđuid mii dárbbašit go galgat álggahit buriid doaibmabijuid ja buoridit guoskevaš veahkkeapparáhta kvalitehta sihke daid várás geaidda veahkaváldi čuohcá ja daid várás geat čađahit veahkaválddi. Olbmot geat leat rašis dilis, dárbbašit oadjebasvuođa go deaivvadit vejolaš veahkkeapparáhtain. Danne lea Sámediggeráđđái deaŧalaš ahte veahkkeapparáhtas lea máhttu sámi giela ja kultuvrra birra, dadjá Larsen.
Prošeakta lea almmuhuvvon Doffin:ii, mii lea Norgga almmolaš háhkamiid nationála uskkádat.
http://www.doffin.no/search/show/search_view.aspx?ID=JUN198849
Eanet dieđuid addá ráđđelahttu Vibeke Larsen, + 47 941 30 116