Sámedikki dievasčoahkkin mearridii geassemánus ahte vihtta ođđa gieldda galget ealáhusovddidandoarjaga doaibmaguvlui (SNT-guovlu). Ealáhusdolliide Báhccavuonas, Gálssain, Ráissas, Skiervvás ja Siellatgielddas mearkkaša dát dan ahte sáhttet ohcat doarjaga ealáhusovddidanulbmiliidda Sámedikkis. Ráđđelahttu Marianne Balto galleda gielddaid 36. vahkus.
- Vuosttažettiin lean ilus go STN-guovlu geassit viiddiduvvui ja olles vihtta gieldda bohte mielde. Sámedikki ealáhuspolitihka váldomihttomearrin lea háhkat nana ja juohkelágan ealáhuseallima man vuođđun leat eallinfámolaš báikegottit gos olbmot háliidit ássat. Dan oktavuođas go STN-guovlu viiddiduvvo, sáhttet eanet ealáhusaktevrrat sámi guovlluin oažžut vejolašvuođa nannet doaimmaset, dadjá ráđđelahttu Marianne Balto.
Ráđđelahttu Balto mátki ulbmilin lea oahpásmuvvat buorebut ođđa gielddaide STN-guovllus, ja dasto juohkit dieđuid dan birra ahte maid dat mearkkaša gielddaide go leat mielde doaibmaguovllus.
- Mun háliidan erenoamážit čiekŋaleappot guorahallat movt ealáhuseallin sierra gielddain lea, makkár surggiiguin áŋgiruššet gielddain boahtteáiggis ja barget go erenoamáš prošeavttaiguin, cealká ráđđelahttu Marianne Balto.
Dasto deattuha ráđđelahttu Balto ahte čoahkkimat ođđa gielddain šaddet deaŧalaččat ságastallama oktavuođas, maid Sámediggi ja sierra aktevrrat sáhttet bargat ovttas ja movt ovdánahttit ealáhusaid.
Dan rájes go vihtta gieldda leat lasihuvvon STN-guvlui, lea Sámediggeráđđi juo juolludan doarjaga ealáhusovddideapmái ovtta gielddas. “Solbakken gård” Gálssaid suohkanis lea ožžon doarjaga gitta 250 000 ru rádjai doaimma viidáseappot ovddideapmái. “Solbakken gård” lea ekologalaš sávzadoallu mii buvttada maiddái ruotnasiid. Seamma gielddas lea maiddái fitnodat “Motor og Båtservise DA” ožžon doarjaga 56 000 ru luoitin- ja bádjerusttega viidáseappot ovddideapmái.
- Mii leat ilus go mii dál juo oaidnit ahte ealáhusaktevrrat guoskevaš guovlluin geavahit min doarjjaortnegiid. Mun doaivvun ahte eanet ealáhusaktevrrat geavahivčče ortnegiid áiggis ovddasguvlui nu ahte mii ovttas sáhtášeimmet positiivvalaččat ovddidit ealáhusaid sámi guovlluin, dadjá ráđđelahttu Marianne Balto loahpas.
Gulahallanolmmoš:
Ráđđelahttu Marianne Balto, tel. 480 63 358.