Sámediggi searvá dán jagi givssideami vuostálastináŋggirdeapmái ”Rávesolbmot duddjojit ustitvuođa ovttas”Julggašteapmi givssideami vuostá olis čakčamánu 2. - 6. beivviid. Várrepresideanta Odd Iver Sara ávžžuha olles sámi servodaga čalmmustit ustitvuođabeaivvi čakčamánu 5. b.
-Jos mii galgat nagodit bissehit givssideami, de fertet mii rávesolbmot bargat ovttas ásahusaid ja surggiid rájáid rastá, ja duddjot dakkár birrasiid gos lea buohkaide sadji. Mun doaivvun danne ahte skuvllat, asttuáiggesearvvit, valáštallansearvvit ja doaimmat čalmmustit ustitvuođabeaivvi mii lea čakčamánu 5. beaivvi. Vealtameahttun deaŧalaš lea dat ahte mii rávesolbmot doaibmat buorrin ovdagovvan ja leat oidnosis, ja ásahit buriid bajásšaddan- ja oahppanbirrasiid min iežamet ja earáid mánáid várás, dadjá várrepresideanta Odd Iver Sara.
Sara ávžžuha erenoamážit vánhemiid áŋggirdit ja doarjut dán jagi áŋggirdeami, ja doaivu ahte skuvla, mánáidgárddit ja earát leat veahkkin ásaheamen arenaid áŋggirdanvahkus, gos lea vejolaš bidjat guovddážii ustitvuođa, gierdavašvuođa ja birrasa gos ii leat givssideapmi. Son ávžžuha sámi skuvlaohppiid, váhnemiid ja eará rávesolbmuid geavahit fáddásáni; ustitvuohta sosiála mediain árjjalaččat.
-Bija gova Instagrammii, tweet:i ja almmut sisdoalu sosiála mediain mat čájehit du miellaguottuid givssideami vuostá ja ustitvuođa birra. Skuvlamánát, váhnemat, doaimmat ja earát sáhttet ávžžuhit guđet guimmiideaset ráhkadit stafeahta das. Dasto ávžžuhan mun Sámedikkis sihke bargiid ja álbmotválljen ovddasteddjiid geavahit sosiála mediaid ja fysalaš arenaid árjjalaččat, ja dieinna lágiin čalmmustit man deaŧalaš ustitvuohta ja ustitlašvuohta lea, dadjá Sara loahpas.
--
Julggaštus givssideami vuostá lea ovttasbargoprošeakta beliid gaskka servodagas, bargoeallimis ja skuvlasuorggis man ulbmilin livččii bissehit givssideami. Dán jagi lágiduvvo áŋggirdeapmi čakčamánu 2. – 6. beivviid, man oktavuođas biddjojuvvo guovddážii dán jagi fáddá mii lea “Rávesolbmot duddjojit ustitvuođa ovttas”. Geahča movt don sáhtášit searvat (neahttaleaŋka).
Gulahallan
Várrepresideanta Odd Iver Sara, tel. +47 416 61 621