Nationála dulkabálvalus lea okta máŋgga deaŧalaš doaibmabijuin go galgá juksat dásseárvosaš dearvvašvuođabálvalusa sámi buhcciide, oaivvilda sámediggeráđđi Ellinor Marita Jåma.
Dán vahkus biddjojuvvojedje ovdan Finnmárkku Dearvvašvuođa 2-jahkásaš dulkaprošeavtta bohtosat. Prošeakta čájeha ahte gávdnojit sihke buorit ja sihkkaris teknihkalaš čovdosat gáiddusdulkoma várás neahta, video ja jiena bokte ja dat rávve ahte bálvalus huksejuvvo dađistaga birrajándor doaibman golmma viđa jagi siste.
Jåma registrere dál ahte maiddái ráđđehusa ovddasteaddjit dovddahit dárbbu nannet rahčamuša juksan dihtii dásseárvosaš fálaldaga dearvvašvuođabálvalusaid sámi geavaheddjiide.
- Dás lea sáhka árvvusatnimis olbmo giela ja kultuvrra, ja dás lea sáhka das ahte beassat geavahit iežas giela go lea oktavuohta dikšo- ja fuolahusdoaimmain. Ja dalle mun vuorddán ahte ráđđehus dál árjjalaččat váikkuha ahte dulkaprošeakta Finnmárkkus viiddiduvvo nationála bálvalussan buot sápmelaččaide, dadjá Jåma.
Vaikke vel sámi buhcciin lea ge vuoigatvuohta beassat geavahit sámegiela go lea oktavuohta dearvvašvuođabargiiguin, de leat uhccán dearvvašvuođaásahusat main leat dulkkat fidnemis. Buori muddui navdet ahte sámi buohcci hálddaša dárogiela doarvái bures, dahje sii geavahit oapmahaččaid dahje eará deivvolaš olbmuid dulkan.
- Dásseárvosaš dearvvašvuođabálvalussii sápmelaččaid várás ferte gullat dat ahte láhčit dilálašvuođa dasa ahte buohcci beassá geavahit iežas giela. Muhto mii fertet maid sihkkarastit ahte bargiin lea máhtolašvuohta sámegielas ja buohcci kulturduogážis. Digitála dulkabálvalus ii duste buot hástalusaid, muhto lea rivttes lávki dásseárvosaš dearvvašvuođabálvalusa juksamis, deattuha Jåma.
---
Finnmárkku Dearvvašvuođa dulkaprošeakta lea Finnmárkku Dearvvašvuođa, Sámedikki ja Nasjonalt Senter for samhandling og telemedisin gaskasaš ovttasbargu. Dás sáhtát lohkat raportta prošeavtta birra.
Gulahalli
Sámediggeráđđi Ellinor Marita Jåma, tel. 916 13 460