Sámediggi lea čállán čilgehusa sámi valáštallama birra, mas guovdilis hástalusat ja ráđi strategiijat sámi valáštallama várás válddahuvvojit. -Ráđđi ovddida čilgehusa sámi valáštallama birra Sámedikki boahtte dievasčoahkkimii. Dat šaddá duppal historjjálaš. Dievasčoahkkin meannuda vuosttaš geardde ášši sámi valáštallama birra, ja dievasčoahkkin dollojuvvo vuosttaš geardde Stuorradikkis Oslos. Mii sávvat ahte dát movttiidahttá sámi valáštallama duppalit, dadjá sámediggeráđđi Henrik Olsen.
-Sámediggeráđđái lea deaŧalaš ahte láhččojuvvo valáštallandoaimmaide main sámi gullevašvuohta, sámi duogáš ja kultuvra ja giella leat lunddolaččat, dadjá Henrik Olsen
Deaŧalaš rolla
Valáštallamis lea deaŧalaš rolla sámi servodagas.
–Sámediggeráđđi áigu váikkuhit ahte sámi valáštallama organiseren nannejuvvo, ja háliida addit valáštallamii šiehtadallanvejolašvuođa Sámedikkiin seamma láhkai go dáiddár- ja duodjeorganisašuvnnain lea, dadjá Olsen.
Movttiidahttin
-Lea deaŧalaš movttiidahttit sámi nuoraid áŋgiruššat valáštallamiin, ja danne áigu ráđđi joatkit valáštallan- ja kulturstipeandda nuoraide. Lea deaŧalaš ahte sámi valáštallit ožžot vejolašvuođa oassálastit nationála ja riikkaidgaskasaš arenaide nu go AWG:i, riikkaidgaskasaš gilvvohallamiidda jna., loahpa Olsen.