Sámediggi, Sámi allaskuvla ja Engerdal suohkan vuolláičálle guovvamánu 5. b. šiehtadusa sihkkarastin ja ovddidan dihtii lullisámi gealboguovddáža Elgås Engerdal suohkanis. Šiehtadus mearkkaša ahte Sámi allaskuvla ásahuvvo lullisámi guvlui sierra ossodaga bokte Sámi lohkanguovddáža vuollásažžan, mii lea Guovdageainnus.
Šiehtadusa ulbmil lea sihkkarastit ja ovddidit lullisámi oahpponeavvo- ja terminologiijabarggu, mii fas buoridivččii lullisámi mánáid ja nuoraid oahpahusa kvalitehta.
-Lean ilus ja rámis daid positiiva bohtosiid geažil maid mii leat ollašuhttán guhkes ovttasbarggu bokte Sámedikkiin, Sámi allaskuvllain ja Engerdal suohkaniin, ja lean duhtavaš go mii dál formaliseret dan ovttasbarggu vai mii ovttas sáhttit bargat guhkesáiggi ulbmiliin, ja ahte mii sihkkarastit einnostanvejolašvuođa Elgå fágabirrasii, dadjá Sámedikki várrepresideanta Laila Susanne Vars.
Várrepresideanta vuolláičálii golmmajahkásaš šiehtadusa Sámedikki bealis meanuin Trysilis, gosa maiddái Engerdala sátnejođiheaddji Lars Erik Hylland, Engerdala suohkana ovdagoddi ja Sámi lohkanguovddáža jođiheaddji Lisa Baal oassálaste.
Šiehtadusa duogáš
Sámediggi ásahii giellamovttiidahttinprošeavtta sámi ohppiid várás ovddeš Elgå skuvlii Engerdal suohkanis 2001:s, dát prošeakta lea hui bures lihkostuvvan.
Elgå skuvla heaittihuvvui uhccán ohppiid geažil. Sámedikki giellamovttiidahttinprošeavtta ja nannoset oahpahusmodealla bokte skuvllas lea Elgå skuvla háhkan ollu gelbbolašvuođa sihke geavada ja lasseoahpu bokte. bealit háliidit joatkit ja viidáseappot ovddidit dán gelbbolašvuođa, vai dat boahtá lullisámi ohppiide buorrin. Lea deaŧalaš ahte dán gelbbolašvuhtii Engerdalas sihkkarastojuvvojit buorit ja einnostanvejolaš rámmát ovdáneapmái. Stáhtabušeahta bokte lea Sámediggi ožžon ovddasvástádusa dan čuovvoleamis.
Historjjálaš šiehtadus
Sámedikki várrepresideanta Laila Susanne Vars lohká dán šiehtadusa historjjálažžan. Dat lea mielde nannemin lullisámi oahpahusa ja oahpponeavvoráhkadeami.
-Šiehtadus dohkkeha dan issoras stuorra barggu maid báikkálaš resursaolbmot leat čađahan oahpponeavvuiguin ja giellabargguin Elgås, ja mun sávan ahte Sámi lohkanguovddáža ásaheapmi lullisámi guvlui Norggas addá positiiva váikkuhusaid olles lullisámi regiovdnii. Lean ilus go Sámi allaskuvla dál oidno buorebut lullisámi giellaguovllus, ja oainnán ahte lea dárbu ja vejolašvuođat maiddái sullasaš ovttasbargui julevsámi guovllus, dadjá várrepresideanta Laila Susanne Vars.
Várrepresideanta dovddahii sártnistis giitevašvuođa dan buorredáhtolašvuođa ja buori ovttasbargovuoiŋŋa ovddas maid Engerdala báikkálaš politihkkárat ja Sámi allaskuvlla jođiheaddjit leat čájehan šiehtadusproseassas, ja dajai ahte son sávvá ahte Engerdala suohkan dál árvvoštallá ásahit sámi kulturguovddáža suohkanii sámi kulturgaskkusteami arenan.
Šiehtadusas lea 1 miljon ruvdnosaš jahkásaš vuođđorámma. Dasa lassin lea Sámediggi geatnegahttojuvvon ruhtadit lullisámi oahpponeavvoohcamiid ovttasbargošiehtadusa ulbmila olis.
Váldde oktavuođa: Várrepresideanta Laila Susanne Vars, + 47 977 54 102
