Sámedikki presideanta Aili Keskitalo searvá álgoálbmogiid bissovaš forumii New York:s cuoŋománu loahpas. Nuorat, iežas hávváduhttin ja iežas sorbmen lea okta fáttáin mainna Sámediggi erenoamážit áigu áŋgiruššat dán jagi.
ON álgoálbmogiid bissovaš forum lágiduvvo juohke jagi New York:s. Dán jági sešuvdna lea áigodagas 20.04. - 01.05. 2015.
Sámediggeráđi beales servet Sámedikki presideanta Aili Keskitalo, politihkalaš ráđđeaddi Runar Myrnes Balto ja Sámedikki riikkaidgaskasaš ovddasteaddji John Bernhard Henriksen. Sámedikki nuoraidpolitihkalaš lávdegotti ovddasta dán jagi Ida Ristiinna Hætta Ophaug.
Relevánta sámiide
Sámedikkis leat ollu fáttát mat beroštahttet. Álgoálbmogiid máilmmikonferánssa čuovvoleapmi ja dan 2014 loahppadokumeanta. Fáddá meannuduvvon foruma vuosttaš beaivvi.
Seamma áiggi dollojuvvo seminára Columbia Univerisitehtas áigodagas 24. – 26.04. máilmmikonferánssa loahppadokumeantta birra masa Sámediggi áigu searvat.
http://www.columbia.edu/cu/cser/downloads/UiTColumbiaSeminar.pdf
Nuppi vahkus meannuduvvo ON álgoálbmotvuoigatvuođaid julggaštusa čađaheapmi masa Sámediggi álo láve searvat.
-Sámediggi háliida áinnas diehtit mii jurddašuvvo foruma boahtteáiggi barggu birra, go diibmá almmuhuvvui ahte áigo geahčadit vugiid ja vejolašvuođaid movt ođasmahttit foruma, dadjá Sámedikki presideanta Aili Keskitalo.
Iežas sorbmen ja iežas hávváduhttin
Bissovaš foruma sešuvnnas lea fáddán nuorat, iežas hávváduhttin ja iežas sorbmen.
-Dát lea stuorra váttisvuohta mii erenoamážit čuohcá ollu álgoálbmotservodagaide, ja mii gáibida johtilis doaimmaid maiguin eastadit dán negatiivvalaš ovdáneami. Nuoraid massin lea maiddái servodatváttisvuohta ja buktá stuorra morraša lagamuččaide, dadjá Sámedikki presideanta Aili Keskitalo.
-Fáddá guoská midjiide ja mii áigut muitalit min vásihusaid iežas hávváduhttima ja iežas sorbmema eastadeami birra, dadjá Keskitalo.
Gulahallanolmmoš: Sámedikki presideanta Aili Keskitalo, 971 29 305
Loga eambbo dás: