Stuoradikki olgoriikalávdegoddi ovddidii cuoŋománu 11.b. árvalusástis Stuoradiggái ráđđehusa davviguovllodieđáhussii. Lávdegotti eanetlohku evttoha ahte Davvi Norgii ráhkaduvvo sierra máhtolašvuođastrategiija. Sámedikki várrepresideanta Laila Susanne Vars lea ilus go lávdegoddi čalmmustahtte álgoálbmogiid ja máhtolašvuođa davvin.
- Sámedikkeráđi bealis searvvaimet mii Stuoradikki gulaskuddančoahkkimii ja mii ákkastalaimet ahte mii vuordit eanet doaimmaid davvin mat gusket máhtolašvuhtii ja máhttobirrasiid nannemii, maiddái daid smávit sámi máhttobirrasiid nannet. Mun leange ilus go lávdegotti eanetlohku dál evttoha sierra máhtolašvuođastrategiija davviguovlluide, ja ahte sierra doaibmabijuid álggahit hehttendihte ahte nuorat heitet joatkkaoahpahusas. Dasa lassin lea buorre ahte lávdegoddi oaidná dárbbu ahte davviguovllopolitihkas galgá eanet ávki báikkálaš guovlluide, dadjá Laila Susanne Vars.
Stuoradikki evttohusas daddjo unnitlogu bealis ahte berre ásahuvvot sierra ealáhusfoanda Lofuohta ja Viestterála guvlui masa biddjo 5 millijárdda ruvnno báikkálaš ealáhusovdáneapmái.
- Sámedikki bealis deattuhit mii ahte go galget eanet doaimmat davviguovlluin, de galgá maid gulahallan álgoálbmogiid ja stáhta eiseválddiid gaskkas ja álgoálbmogiid ja industriija gaskkas. Álgoálbmogat galget beassat váikkuhit iešguđet prošeavttaid álggu rájes vai álgoálbmogiid olmmošvuoigatvuođat vuhtiiváldojuvvojit ja vai árbevirolaš sámi ealáhusat sihkkarastojuvvojit boahtteáigái. Lea miellagiddevaš ahte lávdegotti unnitlohku evttoha sierra ealáhusfoandda mii galgá nannet báikkálaš ealáhusaid, diekkár jurdagat leat maid Sámedikkis digaštallon, dadjá Sámedikki várrepresideanta Laila Susanne Vars.
Sámediggeráđđi mearkkaša ahte komitéa maiddái oaidná, ja váldá vuhtii dan obbalaš davviguovlluperspektiivva, mii guoská sámiide.
- Mun lean ilus go komitéa deattuha dehálažžan sihkarastit bistevaš ruhtadeami Sámi Gelbbolašvuođaguovddážii Guoládagas, Murmánska fylkkas. Gelbbolašvuođalokten lea guovddážis jus galgat sihkkarastit ahte álgoálbmogiidda vejolašvuođa oassálastit aktiivvalaččat ja vuoiggalaččat mearrádusaide mat dáhpáhuvvet davviguovlluin, dadjá várrepresideanta.
Oktasaš olgoriikalávdegoddi doarju davviguovllodieđáhusa álgoálbmotpolitihka. Lávdegoddi čujuha ráđđehusa 2009 davviguovllostrategiijii, ja bivdá ráđđehusa jođaneappot bargat dáigguin doaimmaiguin.
- Lea mearkkašanveara ahte lávdegoddi bivdá ráđđehusa jođáneappot bargat álgoálbmotvuoigatvuođaid nannemiin, erenoamažit lea dehálaš oažžut etihkalaš njuolggádusaid fitnodagaide geat ásahit doaimmaid álgoálbmotguovlluide. Sámediggeráđđi lea ovttaoaivilis ahte lea dárbu eanet návccaid bidjat dáidda doaimmaide mat galget nannet álgoálbmotvuoigatvuođaid davvipolitihkas, dadjá Vars loahpas.
Oktavuođaolmmoš:
Sámedikki várrepresideanta Láilá Susanne Vars, mob: 977 54 102