Sámediggepresideanta Aili Keskitalo (NSR) lea duhtavaš virgádemiin.
- Inger Marit Eira-Åhrén lea olles proseassas čájehan nana servodatáddejumi ja máhtu sámi servodaga birra, dasa lassin lea čájehan stuorra áddejumi almmolaš hálddašeapmái ja politihkalaš proseassaide. Sus leat máŋggalágan vásihusat iešguđege luohttámušdoaimmain ja posišuvnnain, ja son lea čielga ja movttiidahtti jođiheaddji, dadjá Aili Keskitalo.
Njealjis ledje ohcan direktevravirgái Sámedikkis dalle go ohcanáigemearri nogai guovvamánu 23. b. 2020. Dáláš direktevra Rune Fjellheim lea bargan guokte jahkemearreáigodaga, čakčamánu 1. b. 2008 rájes.
Girjás duogáš
Inger Marit Eira-Åhrén lea eret Guovdageainnus, muhto ássá ja bargá máttasámi servodagas gos son jođiha ovttadaga mas lea ovddasvástádus sámi giellahálddašeames Snoasa suohkanis ja jođiha suohkana giellaguovddáža Gielem nastedh. Eira-Åhrénas lea vásihus almmolaš doaimmain suohkana, regionála ja nationála dásis, sihke hálddahusa ja politihkalaš dásis. Sus lea buorre máhttu sámi gielas ja kultuvrras, ja sus lea áidnalunddot áddejupmi politihkalaš máilmmis sihke Sámis ja muđui riikkas.
- Sámedikki bajimuš hálddahuslaš jođiheaddjis ferte leat dáidu oaidnit stuorra gova, leat analyhtalaš ja bargat bures fága ja politihka gaskasaš oktavuođas. Inger Marit Eira-Åhrén deavdá buot min vuordámušaid ja sus leat dakkár persovnnalaš attáldagat mat adnojit go galgá bargat Sámedikki direktevran. Son máhttá čielgasit gulahallat, sus lea fokus vejolašvuođaide ja lea áddejupmi ja motivašuvdna ovddideapmái. Mii vuordit mielas lávga ja buori ovttasbarggu čavčča rájes, dadjá sámediggepresideanta Aili Keskitalo.
Gulahallanolbmot media ektui:
Sámediggepresideanta Aili Keskitalo (NSR), tel: +47 971 29 305
Runar Myrnes Balto + 47 977 73 778
Sámedikki direktevrra virgáibidjanlávdegottis leat leamaš Runar Myrnes Balto (NSR), Ronny Wilhelmsen (Bb), Cecilie Hansen (Gb), Tor Gunnar Nystad (NSR) ja Inger Eline Eriksen Fjellgren (Árja).
Dieđut Inger Marit Eira-Åhrén (46) birra:
- Son lea eret Guovdageainnus, muhto bargá dál Snoasa suohkanis gos son jođiha ovttadaga mas lea ovddasvástádus suohkana sámi giellahálddašeames ja suohkana giellaguovddážis Gielem nastedh
- Hupmá njuovžilit davvisámegiela ja lea buorre máhttu máttasámegielas njálmmálaččat
- Sus lea máŋggalágan fágaduogáš bachelor buohccidikšumis (Høgskolen i Finnmark, 1998) ja sus lea viidásetoahppu biepmus, psykalaš dearvvašvuođas ja máŋggakultuvrralaš áddejumis ja oahpuin dutkanetihkka ja dutkanmetodihkka (Sámi allaskuvla, HiOA ja Davvi universitehta)
- Sus lea siidaoassi Tjåehkere sijtes ovttas su guimmiin
- Sus lea politihkalaš duogáš, nugo earret eará politihkalaš ráđđeaddi Sosiála- ja dearvvašvuođadepartemeanttas 2000 – 2001, Røyrvik suohkanstivrra lahttu 2007-2011, ja lei gitta 2018 rádjai lahttu Trøndelága fylkkadikkis. Son lei maiddái válgalisttas Sámediggái 2013:s Bargiidbellodaga ovddas.