Sámedikki giellakampánja ”Sámás muinna” manná loahpaguvlui ja giellaambassadevrrat háliidit čalmmustahttit dan ovttas mánáiguin ja nuoraiguin Guovdageainnu beassášfestiválas. Gaskavahkku cuoŋománu 1.b. bovdet mii dolasteapmái ja doppe vuorbádit nuvttá bileahtaid stuora nuoraidkonsertii gos Isac Elliot lávlu Báktehárjjis.
Almmolaš prográmma álgá gaskavahkku cuoŋománu 1.b. dii. 14.00, go Sámedikki giellaambassadevrrat ja sámi ofelaččat bovdejit guoimmuheaddji álggaheapmái beassážiidda. Doppe šaddá stoahkan ja suohtas čierastanluohkás Guovdageainnu mánáidskuvlla duogábealde gaskal dii. 14.00-17.00. Doppe lea dolasteapmi, gažaldatgilvu, čierastallangilvu ja eará.
Doppe beasat maid gullat eanet giellakampánjja birra ja ofelaččaid barggu birra. Mii fállat maid nuvttá gáfe, márffiid ja vel dán: čáppa vuoittuid nu go kampánjadiŋggaid ja nuvttá bileahtaid dan stuora nuoraidkonsertii gos Isac Elliot lávlu Báktehárjjis seamma eahkeda.
Nuoraidkonsearttas oassálastet giellaambassadevrrat iežaset kampánjalávlagiin ja mii sávvat ahte mii oažžut čuđiid mielde govaid instagrámmii #sámásmuinna nammii eahkeda mielde.
Ovdal konseartta bohtet čađahuvvot eanet gilvvut kampánjja Facebook-siiddus main sáhtát vuoitit bileahtaid konsertii, nu ahte ii leat eará go čuovvut mielde lagamus beivviid.
Eanet dieđuid sáhtát oažžut sámediggepresideanttas Aili Keskitalo, 971 29 305.