Karin Tuolja lea olles eallima bargan julevsámi gielain Ruoŧa bealde. Son lea bargan oahpaheaddjin, jorgaleaddjin, oahpponeavvoráhkadeaddjin ja korrekturlohkkin. Tuolja lea hui guovddáš olmmoš julevsámi giellabirrasis, ja lea leamaš hui deaŧalaš Norgga ja Ruoŧa gaskasaš giellaovttasbargui, earenoamážit sániid ja doahpagiid ovddideamis ja Biibala jorgaleamis.
Jekaterina Mechkina oažžu Gollegiela giellabálkkašumi danne go guhká lea bargan gielddasámegiela nannemiin Ruošša bealde. Son lea leamaš mielde sátneriggodaga ja sierra gielddasámi sátnegirjji ovddideamen. Mechkina lea sállán girjjiid, jorgalan girjjiid ja ráhkadan oahpponeavvuid. Su girjjiiguin leat ollugat oahpásmuvvan Murmánska-guovllu gielddasámi eallimii ja kultuvrii.
Gávccát geardi
Gollegiella – davviriikkalaš sámi giellabálkkašupmi juhkkojuvvo gávccát geardde. Giellabálkkašupmi galgá leat mielde ovddideamen, ovdánahttimin ja seailluheamen sámegielaid Norggas, Ruoŧas, Suomas ja Ruoššas.
Giellabálkkašupmi sáhttá addojuvvot ovttaskas olbmuide, organisašuvnnaide dahje ásahusaide mat leat garrasit áŋgiruššan sámegiela ovddidemiin.
Buorit ovdagovat
Sámediggepresideanta Aili Keskitalo ja stáhtaráđđi Monica Mæland Gielda- ja ođasmahttindepartemeanttas sávvaba lihku goappašiid bálkkašupmevuitiide.
– Goappašat bálkkašupmevuoitit leaba buorit ovdagovat, ja leaba deaŧalaččat julev- ja gielddasámegiela nannemis, dadjá stáhtaráđđi Monica Mæland Gielda- ja ođasmahttindepartemeanttas.
– Leat evttohuvvon máŋga buori evttohasa mat leat garrasit áŋgiruššan sámegielaid ovddas. Evttohasat gokčet buori muddui buot sámi giellaguovlluid, ja čájehit stuorra erohusaid ja govdodaga. Sihke organisašuvnnat ja ovttaskas olbmot, árbevirolaš ja ođđaáiggi giellaarenat leat nominerejuvvon ja árvvoštallojuvvon. Stuorra beroštupmi bálkkašupmái ja máŋga buori ja iešguđetlágan evttohasat addet jáhku sámegielaid boahtteáigái, dadjá sámediggepresideanta Aili Keskitalo.
– Jurys leat leamas mielde Suoma beali Neeta Jääskö, Ruoŧa beali David Kroik, Ruošša beali Nina Afanasieva, ja Norgga beali Solvår Knutsen Turi ja Jane Juuso.
Bálkkašupmi geigejuvvo Karin Tuoljai guovvamánu 26. b. Oslos, ja Jekaterina Mechkinai guovvamánu 29. b. Murmánskkas.
Jus áiggut eanet dieđuid:
Sámediggepresideanta Aili Keskitalo, 971 29 305
Ákkastallan: