Sámediggeráđđi lea mearridan juolludit 300 000 ruvnno organisašuvdnaovddideami bargui Norgga Boazosápmelaččaid Riikkasearvvis (NBR). Lea buorre go NBR lea háliidan bargat organisašuvdnaovddidemiin, lohká sámediggeráđđi Silje Karine Muotka.
Ulbmil organisašuvdnaovddidemiin lea sihkkarastit nanu boazodoalloorganisašuvnna mii lea gievrrat iežas barggus váldimis vára boazodoalloberoštumiin.
- Duohtavuohta lea ahte váikkuheapmi otná mearridanproseassain gáibida gievrras váikkuhanfámu ja nanu fokusa organisašuvnnas bargoreaidun nu ahte sáhttá váikkuhit. Min mielas lea gelddolaš go NBR dál áigu geahčadit dálá organisašuvdnastruktuvrra, hábmet ođđasit áigumušaid ja áŋgiruššansurggiid, ja geahččalit čielggadit evttohusaid ođđa organiseremii, lohká sámediggeráđđi Muotka.
Sámedikki bargu boazodoalloáššiiguin lea huksejuvvon buori ovttasbarggu nala boazodoaluin.
- Okta min mihttomeriin lea, ovttasbarggus NBR:in, váikkuhit dasa ahte sihke NBR ja orohagat nannejuvvošedje ja profešonaliserejuvvošedje iežaset barggus váldimis vára boazodoalu vuoigatvuođain ja beroštumiin, loahpaha Silje Karine Muotka.
Oktavuođaolmmoš:
Sámediggeráđđi Silje Karine Muotka, tel. 98487576