– Dađistaga eanet nuorra olbmot riddo- ja vuotnaguovlluin háliidit váldit giela ja kultuvrra ruovttoluotta. Nuorra olbmot geat eai huma sámegiela beaivválaččat geavahit sámegiela vuotnasániid seaguhuvvon dárogiel sániiguin. Dát čájeha sániid geavatlaš mearkkašumi, ja beroštumi máhttit daid. Nu leage deaŧalaš ahte geavaheddjiin lea álki gávdnat vuotnasániid, dadjá Sámedikki presideanta Aili Keskitalo.
– Giellaapplikašuvnnat fanas- ja vuotnaterminologiija birra sáhttet buvttihit ođđa beroštumi, sihke sámegillii, muhto maiddái vuona birra ja báikkálaš kultuvrii fatnasa, fanasduddjoma, fatnasiid geavaheami ektui Porsáŋggus. Mearrafanasterminologiija siskkilda sániid mat gusket fanasosiide, fanasduddjomii, reaidduide, dávviriidda ja ollu beliide fanasgeavaheami oktavuođas, nugo borjjasteapmi, suhkan ja fatnasa mohtoriin geavaheapmi, dadjá Keskitalo.
Porsáŋggu mearrasámi diehtoguovddáš galgá gozihit, nannet ja gaskkustit sámi giela ja kultuvrra mearrasámi guovlluin. Sii lea guhkkit áiggi bargan báikkálaš máhtuin ja árbedieđuiguin, ja erenoamážit kultuvrra birra vuonas.
Giellaapplikašuvnnat galget váikkuhit dan ahte eanet olbmot ohppet mearrasámi sániid ja doahpagiid, ja bidjá dieinna lágiin vuođu dáid árbevieruid suodjaleapmái ja viidásetfievrrideapmái. Prošeakta galgá maiddái váikkuhit nuorra olbmuid čeavláivuođa ja iešdovddu nannema mearrasámi árbevieruid ektui mat gusket vutnii ja dan geavaheapmái.
Eanet dieđuid addá Sámedikki presideanta Aili Keskitalo, 971 29 305