Sámedikki presideanta Egil Olli lea hui duhtavaš go Kiinná ja máilmmi eanaš stáhtat dál dohkkehit Álttá 2013 loahppadokumeantta. Stáhtat háliidit ahte álgoálbmogiid oktasaš julggaštus galgá biddjojuvvot vuođđun boahttejagi máilmmikonferánsii álgoálbmogiid vuoigatvuođaid birra.
- Dát ovddasta hui stuorra vuoitun máilmmi álgoálbmogiidda, ja min stáhtusa dohkkeheapmi álbmogin ja min oainnuid dohkkeheapmi. Dat mearkkaša ahte álgoálbmogat besset searvat seamma dásis stáhtaiguin ja ahte min politihkalaš oainnut váldojuvvojit duođas ja ahte stáhtat ja álgoálbmogat duođas daid digaštallet duohtavuođas, dadjá Olli.
Stáhtaidgaskasaš ovttasbargojoavku, gohčoduvvon ”G77-joavku+Kiinná”, mii čakčamánu 26. b. čoahkkimisttis buvttii ovdan positiiva oainnuid Álttá-julggaštussii. G77-joavkku cealkámušas celket stáhtat ahte ON váldočoahkkima máilmmikonferánsii álgoálbmotvuoigatvuođaid birra boahtte jagi berrejit máilmmi álgoálbmogat oassálastit árjjalaččat, ja maiddái Álttá-julggaštusa sisdoalu ektui. G77-joavku+Kiinná ovddasta 130 stáhta ja eanet logu ON mielahttostáhtain.
- Lean issoras rámis, ja lea erenoamáš duhtadahttin diehtit ahte Sámedikki rahčamuš álgoálbmotkonferánssa Áltá 2013 lágidemiin dán geasi buvttiha dákkár historjjálaš proseassa ON:i. Mii vásihit historjjálaš fuomášahtti riikkaidgaskasaš rievdadusa ovttasbarggus gaskal stáhtaid ja álgoálbmogiid, dadjá Olli.
Áltá 2013 loahppadokumeanta lea ovdalis sáddejuvvon ON váldočállái Ban Ki-moon. Norga lei okta dain máŋga stáhtain mat vuolláičálle dan reive mii sáddejuvvui, ja Álttá-julggaštus lea dál almmuhuvvon virggálaš dokumeantan ON váldočoahkkimii.
ON olmmošvuoigatvuođaráđđi (MR-ráđđi) lea julggaštusastis rávven stáhtaid láhčit dilálašvuođaid álgoálbmogiid oktasaš oassálastimii váldočoahkkima máilmmikonferánsii boahtte jagi. MR-ráđđi rávve maiddái ahte Álttá-julggaštus biddjojuvvo vuođđun váldočoahkkima birrabeavdekonferánsii 2014 čavčča.
Gulahallan
Sámedikki presideanta Egil Olli, tel. +47 900 26 880
Liŋkat
Govaid: Ben Powless, WCIP