Sámediggi diehtá ahte ollu duodjefitnodagaide sáhttá koronaheahtedili geažil šaddat váttis vuovdit iežaset buktagiid. Dat sáhttá dagahit váttis ekonomalaš dili.
Danne lea Sámediggi mearridan gieđahallat buot doarjjaohcamiid dađistaga go bohtet 25.10.2020 rádjái, mii lea maŋimuš ohcanáigemearri doaibmadoarjaga ohcat. Ođđa ohcciid dáfus duodjeregisterii, de gieđahallat daid dađistaga maŋimuš ohcanáigemeari rádjái 01.06.2020. Dat guoská maid ohcamiidda lassibuktagiid dohkkehit.
– Mii vuorjašuvvat min duojáriid geažil jus dietnasa massášedje, ja sávvat ahte doaibmabidju livččii veahkkin buorideamen ekonomalaš dili, dadjá Sámediggeráđi Hans Ole Eira (Gb).