Norsk kulturindeks 2012 Resultater fra samisk område.pdf 1,27 MB
Barggolašvuohta lassána kulturealáhusain sámi guovlluin. Dan čájeha raporta maid Telemarkforsking lea čállán Sámedikki ovddas.
Raporta čájeha ahte lassáneapmi lea leamaš stuorámus vásáhus- ja doaibmafitnodagain ja beroštusorganisašuvnnain. Barggolašvuohta lea lagabui duppalastojuvvon ja lea stuorát lassáneapmi go riikkaoasis ja Norggas muđui, čájeha Telemarksforsking raporta.
Sámi guovlluin barget 594 olbmo iešguđet kulturvirggiin. Dain barget 204 medias, 110 barget iešguđetlágan dáiddalaš bargguiguin, 228 olbmo barget kulturgaskkustemiin, omd. musea- ja girjerádjobargin, ja 52 olbmo barget dáiddaoahpahemiin kulturskuvllas dahje sullasaš sajiin.
Norgga kulturindeaksa
Norgga kulturindeaksa addá jahkásaš visogova kulturfálaldagain ja kulturdoaimmain Norgga gielddain, regiovnnain ja fylkkain. Indeaksa vuođđuduvvo dieđuide máŋgga almmolaš etáhtas, beroštusorganisašuvnnas ja searvvis. Dán raporttas bidjá Telemarksforsking ovdan bohtosiid ja dárkilis dieđuid sámi gielddain.
Dáiddárgielda
Oktiibuot 96 dáiddára orrot sámi guovlluin, čájeha Telemarksforsking raporta. Dat vástida guovtti dáidárii juohke duhát ássis, dávjodat mii lea sullii bealli riikkagaskamearis. Dáiddáriid lohku sámi guovlluin lea lassánan 6 proseanttain maŋimus jagi. Riikkadásis ii leat dáiddárdávjodat lassánan.
Sámi guovlluid gielddain lea Guovdageaidnu dat stuorra dáiddárgielda. Doppe leat 30 dáiddára mii mearkkaša 10,2 juohke duhát ássis, nappo okta proseanta ássiin, ja sii leat lahttun ovtta dahje máŋgga dáiddárorganisašuvnnas. Dušše Guovdageainnus leat 17 musihkkára ja komponistta, čieža neavttára ja guhtta visuála dáiddára. Guovdageaidnu lea goalmmát stuorámus dáiddárgielda Norggas.
Kulturdieđáhus
-Raporta lea deaŧalaš máhttovuođđu Sámedikki bargui kulturdieđáhusain, dadjá ráđđelahttu Marianne Balto. Son dadjá ahte okta sivain lassáneapmái kulturealáhusain, lea Sámedikki doarjjaortnegat.
Eanet dieđuid addá:
Norgga kulturindeavssa prošeaktajođiheaddji lea Bård Kleppe. Suinna sáhttá váldit oktavuođa telefovnnas 911 97 543 dahje e-poasttas kleppe@tmforsk.no.
Gulahalli Marianne Balto + 47 480 63 358
Loga rápportta.