Ráđđehus ja doarjjabellodagat ledje bovden maŋŋebárgga miessemánu 26. b. gulahallančoahkkimii, gosa Sámediggeráđđi searvvai ja buvttii árvalusaid. Ráđđelahttu Henrik Olsen gesii ovdan dan man deaŧalaš lea buorre kulturgelbbolašvuohta sihke eastadeamis ja dikšumis.
- Buorre kulturgelbbolašvuohta lea hui deaŧalaš dalle go eastadan- ja dikšunfálaldat ovddiduvvo, dadjá ráđđelahttu Henrik Olsen.
Son čujuha viidáseappot dasa ahte dutkan čájeha ahte nuoraid nana sámi identitehta suodjala gárrenmirkkuid boasttugeavaheami vuostá.
- Mis lea máhttu das ahte sámi nuorat juhket unnit go majoritehta álbmot, muhto ollu eará surggiin lea mis menddo unnán máhttu das makkár gárrenávdnasiid sámi nuorat ja rávisolbmot geavahit.
SANAG:is (Sámi nationála gealboguovddáš – psykalaš dearvvašvuohta ja gárrendikšun) lea buorre fálaldat mii lea heivehuvvon sámi álbmoga giella- ja kulturduogážii. Dattetge lea deaŧalaš ahte sis geat galget sáddet pasieanttaid lea máhttu das ahte SÁNAG gávdno ja man deaŧalaš sin gelbbolašvuohta lea. Dán birra muittuhii sámediggeráđđi ráđđehusa earret eará.
- Okta suorgi man birra mis lea unnán máhttu lea maiddái makkár mearkkašupmi dáruiduhttimis ja stigmatiseremis lea leamaš sámi álbmogii. Sámiin leat traumat mat váikkuhit min psykalaš dearvvašvuhtii ja dan birra dárbbašuvvo máhttu, dadjá sámediggeráđđi Henrik Olsen.
Ráđđehus áigut lanseret nannudanplánaid čakčat.
Gulahallanolmmoš:
Ráđđelahttu Henrik Olsen, tel. +47 907 75 219