Sámi ja álgoálbmotkultuvra galgá oidnot ja gullot Álttas máilmmi álgoálbmotkonferánssa oktavuođas geassemánu 09. – 13.06.13. áiggi.
Sámediggi lea dál pláneme doaluid sihke konferánsa oasseváldiide ja earáide. Ieš konferánsa dollojuvvo Finnmárkkuhállas ja dohko besset dušše sii geat leat dieđihuvvon konferánsii, muhto eanás kulturdoalut galget dollot earásajiin go doppe.
Sámediggi lea ovttasbargame sihke Áltta suohkaniin ja eará ásáhusaiguin Álttas ja mii ohcat ain eambbo ovttasbargoguimmiid.
-Mii leat pláneme lágidit Áltta guovddážis olgodoaluid masa buohkat sáhttet searvat. Áltta guovddažis lágiduvvojit golmma beaivvi márkanat masa gávpeolbmot bovdejuvvojit boahtit, dan birra bohtet eambbo dieđut lágideaddjis Áltta valaštallanjoavkkus BUL, dadjá prošeaktamielbargi Sara Margrethe Oskal.
Nuvttá buohkaide
Lávdedáidda galgá maid guovddažis ja olgokonsearttat galget lágiduvvot mat leat nuvtta buohkaide.
-Dain galgá boahtit oidnosii sihke Álttá sámi kultuvra ja mánáid- ja nuoraidlávdedáidda. Konferánssa loahpahuvvo olgokonsearttain gaskavahkoeahkeda ja das galget leat sámi ja internášunálá ártistat, muhto dál eat áiggo vuos almmuhit namaid, dadjá Oskal.
Dákkár konferánse áiggi lávejit dollot nugohčoduvvon "side- events", dahje doalut maid earát go konferánssa lágideaddjit dollet. Áltái vurdojuvvojit sullii 800 olbmo ja dá lea máilmmi buorre vejolašvuohta Álttá ásáhusaide ja earáide lágidit doaluid ja čájehit iežaset.
-Dákkár liige-doalut leat oahppásat konferánssa oasseváldiide, ja oasseváldit sihkkarit vurdet ahte dakkárat gávdnojit. Ja danne mii hástalit Áltta olbmuid ja ásahusaid ieža nai lágidit doaluid. Ii leat go váldit oktavuođa jus ležžet gažaldagat, mii geahččalit doaluide veahkkálagaid gávdnat vuogas áiggiid ja báikkiid , loahpaha Oskal.
Álta 2013 lea konferánsa masa máilmmi álgoálbmot ovddasteaddjit čoahkkanit ráhkkanit Ovttastuvvon Nášuvnnat 2014 máilmmikonferánsii.
Oktavuođadieđut:
Side-events doaluid birra : Jon Petter Gintel, ráđđeaddi, tlf: 78 47 40 84, epoasta: jon.petter.gintal@samediggi.no
Kulturprogramma muđui: Sara Margrethe Oskal, prošeaktamielbargi, 78 48 42 32 , epoasta: sara.margrethe.oskal@samediggi.no