Sámediggi lea media bokte oaidnán ahte Davvi Dearvvašvuođa stivra lea guorahallamin fágaidrasttideaddji spesialiserejuvvon gárrenmirkofálaldaga (FSG) Finnmárkkus. Stivra árvvoštallá galget go sii nannet FSG fálaldaga Finnmárkkus, sirdit fálaldaga SÁNAG:ii dahje sirdit Finnmárkkuklinihka jándorfálaldag ja gárrenmirkopolitihka Áltái.
- Sámediggeráđi mielas lea deaŧalaš ahte sámi giella ja kulturgelbbolašvuohta fuolahuvvo dikšoásahusain gárrenmirkogeavaheddjiid várás. Dát čuovvu Sámedikki cealkámušaid Stuorradiggedieđáhussii gárrenmirkopolitihka birra, dadjá Sámediggeráđi lahttu Ellinor Marita Jåma.
Cealkámušat addojuvvojedje Sámedikki dievasčoahkkima mearrádusa vuođul, ja das deattuhuvvo čielgasit eastadeapmi, dikšu ja suodjaleapmi maŋŋágo lea boahtán ásahusas.
Jåma deattuha ahte Sámediggeráđđi guhká lea oaidnan čielga dárbbu kultuvrii heivehuvvon dikšunvugiide.
- Mii leat čielgasit cealkán ahte sámi giella ja kulturgelbbolašvuohta ferte leat guovddážis go bálvalusfálaldagat plánejuvvojit gárrenmirkogeavaheddjiid várás, loahpaha ráđđelahttu Ellinor Marita Jåma.
Gulahalli:
Ráđđelahttu Ellinor Marita Jåma, tel. 916 13 460