Sámediggi ja Samisk Kunstnerråd/Sámi Dáiddárráđđi (SDR)leat soahpan eanedit doaibmi dáiddáriid bargostipeandarámma. Várrepresideanta Henrik Olsen lea duhtavaš šiehtadusain, muhto hástala gielddaid ja fylkkagielddaid váldit badjelasaset stuorát ovddasvástádusa.
- Sámediggeráđđái lea leamaš deaŧalaš nannet doaibmi dáiddáriid ja seammás váikkuhit buriid rámmaid Sámi Dáiddárráđi bargui. Šiehtadusa rámmat mearkkašit dárbbašlaš rámma dasa ahte nannet sámi dáidaga, dadjá várrepresideanta Henrik Olsen.
Sámediggeráđđi ja SDR leat dál šiehtadan deaivvadit jahkásaš gulahallančoahkkimii. Áigumuššan lea ásahit arena gos sáhttá digaštallat oppalaš dáidda- ja kulturpolitihkalaš doaibmabijuid ja hástalusaid. Henrik Olsen dadjá ahte buorre gulahallan dáiddáriiguin ja dáiddárorganisašuvnnaiguin lea hui deaŧalaš buori dáidda- ja kulturpolitihkkii.
- Háliidan deattuhit ahte sámi dáidda ja kultuvra ii leat dušše Sámedikki ovddasvástádus. Mii háliidit hástalit gielddaid, fylkkagielddaid ja stáhta eiseválddiid maiddái váldit badjelasaset oasiset sámi dáidaga ja kultuvrra ovddideamis.
2014 dáiddáršiehtadusas lea 6.87 miljon ruvdnosaš rámma, mii lea 350.000 ruvdnosaš lassáneapmi gustovaš 2013 šiehtadusa ektui. Bargostipeanda doaibmi dáiddáriidda, doaibmadoarjja SDR:i ja dáiddárorganisašuvnnaide gullet šiehtadusa vuoruhemiide. Vuoruhuvvon leat maiddái SDR fágakonsuleanttat ja bargu ovddidit eanet fágalašvuođa dáiddašlájaid siskkobealde.
Gulahálli
Várrepresideanta Henrik Olsen. tel. +47 907 75 219
