Sámediggi lea fas nagodan oažžut mieđáhusa dasa ahte guolleearri lasihuvvo daidda dorskeguolásteddjiide, geat bivdet riddoearis. Dán vuoru lasihuvvo earri 12 tonnain juohke fatnasa nammii doaibmaguovllus.
-Mu áigumuš lea ahte dat 3000 tonnasaš hivvodat mii lasihuvvui Riddoguolástuslávdegotti evttohusa čuovvoleapmin, galgá boahtit ulbmiljovkui buorrin, dadjá sámediggeráđđi Silje Karine Muotka. Dákko lea Guolástusdirektoráhta bargan riekta go sii leat čuovvolan šiehtadusa riddoguolástuseari ektui, dadjá duhtavaš sámediggeráđđi Silje Karine Muotka.
-Dás lea sáhka dain báikkálaš guolásteddjiin, geat dollet mearrasámi servodagaid bajás. Dál sii besset fas bivdit dorski mearas dán giđa maid, ja mun dieđán dat mearkkaša ollu guolástusservodagaid ekonomiijii, muitala ráđđelahttu.
Cuoŋománu 4. b. bođii diehtu ahte earri lea lasihuvvon 12 tonnas 24 tonnii dáid fatnasiid várás. Dál boahtá vel 12 tonnasaš lasseearri.
-Mun oaivvildan ahte riddoguolásteaddjit galget oažžut stuorát vuođđoeriid go sis leat odne. Mii háliidit sihke rekrutterema guolástemiide ja fatnasiid ođasmahttima, ja dat sihkkarastojuvvo buoremusat dainna lágiin ahte riddofatnasat ožžot bivdit riddoguolástuseari, ja ahte dat ii juogaduvvo ođđasis eará fanasjoavkkuide juovlaskeaŋkan, loahpaha Muotka.
Gulahalli:
Ráđđelahttu Silje Karine Muotka, tel. 984 87 576
Loga eambbo: