Sámi giellaguovddážiin lea guovddáš rolla sámegiela nannen- ja ovddidanbarggus báikkálaččat. Buoret ovttasbargu Sámedikki ja sámi giellaguovddážiid gaskka ja maiddái ovttasbargu giellaguovddážiid gaskka lea okta áŋgiruššansurggiin “Sámedikki strategiijain sámi giellaguovddážiid várás” ja dát ášši galgá meannuduvvot dievasčoahkkimis geassemánus 2015.
-Sámediggeráđđi oaidná deaŧalažžan láhčit diliid árjjalaš ja ealli giellaguovddážiidda, ja evttoha danne ollu rievdadusaid mat earret eará galget leat mielde láhčimin ekonomalaččat einnostan vejolašvuođa ja nannet ovttasbarggu Sámedikki ja giellaguovddážiid gaskka, dadjá Sámedikki presideanta Aili Keskitalo.
Guhkes áiggi badjel
Golmma jagáš doaibmaplána atnui váldima ja aktivitehtadoarjaga lasiheami bokte sámi giellaguovddážiidda duste Sámediggi giellaguovddážiid dárbbu guhkes áiggi plánema ja einnostan vejolašvuođa ektui. Dat mearkkaša dan ahte giellaguovddážat ollu iežas sáhttet stivret iežaset doaimma. Ceahkkálastojuvvon aktivitehtadoarjja addá saji doaimmaid plánemii báikkálaš dárbbuid vuođul ja dasto ahte sáhttá láhčit eanet ollislaš giellaplánema ovttaskas giellaguovddážis.
Lassin dasa go Sámediggi maŋimuš jagiin lea lasihan vuođđodoarjaga giellaguovddážiidda, de lasihit dál maiddái aktivitehtadoarjaga mealgat. Danne vai giellaguovddážat oččošedje einnostan vejolaš ekonomalaš rámma.
–Mii háliidit láhčit stuorát vejolašvuođa doibmii báikkálaččat, ja ahte giellaguovddážiid doaimmaid galget stivret báikkálaš dárbbut gos giellaguovddážat leat, dadjá Keskitalo.
Eanet ovttasbargu
Dasto evttohuvvo ahte Sámediggi eanet válddášii ovddasvástádusa sámi giellaguovddážiid bagadallamis ja ráđđeaddimis. Sámediggi galgá ovttasbargguin giellaguovddážiiguin earret eará láhčit eanet ovttasbarggu, viidáset ovddidit dálá gielladeaivvademiid, lágidit fágalaš čoagganemiid, ásahit fierpmádatforuma ja ráhkadit strategiijaid buoret rekrutterema várás oahpuide sámi gielas ja resursaolbmuid gelbbolašvuođa bajideamis
-Mii diehtit ahte fágalaš gelbbolašvuođa váiluin lea stuorra hástalus, ja ahte lea dárbu buoridit gelbbolašvuođa ja jeavddalaččat bagadit resursaolbmuid sámi giellaguovddážiin. Resursaolbmot leat deaŧalaččat giellaguovddážiin ja šaddá váttis álggahit kurssaid ja doaimmaid sin haga. Danne lea deaŧalaš ráhkadit buriid strategiijaid ja buoridit gelbbolašvuođa, dadjá Sámedikki presideanta Aili Keskitalo.
Sámedikki presideanttas lea jáhkku ovttasbarggu buorideapmái Sámedikki ja sámi giellaguovddážiid gaskka, ja áigut maiddái láhčit eanet ovttasbarggu sierra giellaguovddážiid gaskka.
-Sámedikkis ja sámi giellaguovddážiin lea oktasaš mihttomearri – oažžut eanet giellageavaheddjiid ja oažžut eanet geavahit sámegielaid. Dainna sáhttit lihkostuvvat dušše ovttas, dadjá Keskitalo loahpas.
Eanet dieđuid addá Sámedikki presideanta Aili Keskitalo, 971 29 305
Loga eanet giellaguovddážiid birra: http://www.samediggi.no/Giella/Samas-muinna/Artikler/Sami-giellaguovddazat