Sámediggeráđđi háliida ovttas Nuorta-Sálttu suohkaniiguin gávdnat buriid čovdosiid mo ovddidit guovllu sámevuođa.
Sámediggeráđit Henrik Olsen ja Ann-Mari Thomassen leigga vuosárgga čoahkkimis Hápmira, Stáiggu ja Divttasvuona suohkaniid sátnejođiheddjiiguin, dolastaddančoahkkin maid Árran julevsáme guovdásj lágidii.
- Das oalgguhuvvui viidáset ovttasbargui. Mii leat hui duhtavaččat čoahkkimiin, ja min mielas leat mii čoahkkimis ásahan buori gulahallama ja duddjon buori vuođu bohtosiidda ovttasbarggu bokte, dadjá Henrik Olsen geas earret eará lea ovddasvástádus dearvvašvuođaáššiin sámediggeráđis. – Buori ovttasbarggu bokte han mii sáhttit sihkkarastit buriid dearvvašvuođafálaldagaid mat leat heivehuvvon sámi servodahkii.
Čoahkkima váldoulbmil lei ásahit gulahallama, ja lonohallat dieđuid guhtet guoibmámet barggu birra.
-Sámediggái lea buorre gulahallat daiguin suohkaniiguin main lea sámi álbmot. Dan mii vuoruhit hui bajás, ja lea ge buorre vuohki oahpásmuvvat guhtet guoibmámet bargguide ovdalgo álggahit eanet uhcit geatnegahtti šiehtadusaid, dadjá Ann-Mari Thomassen, sámediggeráđđi geas lea ovddasvástádus earret eará regionálapolitihkas.
Čoahkkimat čuovvoluvvojit formála čoahkkimiiguin gaskal Sámedikki ja regionálaráđi lagas boahtteáiggis, maidda Divttasvuona sátnejođiheaddji bovde.