Odne, borgemánu 9.beaivvi ávvudat mii ON riikkaidgaskasaš eamiálbmotbeaivvi. Máilmmi eamiálbmotbeaivi dohkkehuvvui 1994:s ON váldočoahkkimis, ja beivviin čalmmustuvvo ON eamiálbmotbargojoavkku vuosttaš čoahkkin , mii dollojuvvui 1982:s.
-Mun háliidan sávvat Norgga eamiálbmogii, sápmelaččaide, ja buot eará eamiálbmogiidda lihkku beivviin. Máilmmi eamiálbmogat ovddastit viiddis ja dehálaš gielalaš ja kultuvrralaš máŋggabealatvuođa. Lea illudahtti vásihit oktiigullevašvuođa eamiálbmogiid gaskkas, ja ahte máilmmi eamiálbmogat deaivvadit. Norggas lea earret eará Riddu Riđđu-festivála Gáivuonas Romssas dehálaš deaivvadanbáiki gos máilmmi eamiálbmogiid kultuvra ja dieđut gaskkustuvvojit, cealká gielda- ja ođasmahttinministtar Jan Tore Sanner.
- Máilmmi álgoálbmotbeaivvi háliidan sávvat buot máilmmi álgoálbmogiidda lihku beivviin, muhto seammás háliidan maiddái muittuhit man deaŧalaš dat lea ahte čuovvolit Álgoálbmogiid máilmmikonferánssa loahppadokumeantta. Stáhta čuovvoleapmi livččii deaŧaleamos vuohki iskat árvvusadnojuvvojit go álgoálbmotvuoigatvuođat, ja Norga berre doaibmat buorrin ovdamearkan ja láidesteaddjin. Dat livččii deaŧalaš buot daid máilmmi álgoálbmogiidda mat rahčet sihke geafivuođain ja soardimiin, dadjá doaibmi sámediggepresideanta Silje Karine Muotka.
-Seammás lea dehálaš diehtit ahte ollu eamiálbmogat vásihit systemáhtalaš vealaheami ja ellet hirbmat váttis dilis. Lean ilus go ON vuoruhii eamiálbmogiid vuoigatvuođaid ON eamiálbmogiid máilmmikonfereanssas diibmá. Loahppadokumeanta duođašta ahte lea leamaš rabas ja fátmmastahtti proseassa, mas eamiálbmogat árjjálaččat leat oassálastán. Norgii lea erenoamáš positiivvalaš ahte dokumeanta maiddái lea dohkkehuvvon eamiálbmogiid bealis, cealká Sanner.
Máilmmikonfereansa eamiálbmogiid birra lágiduvvui New Yorkas čakčamánu 22. Ja 23. b.2014. Konfereansa dohkkehii ovttajienalaččat gudneáŋgiris loahppadokumeantta gos stáhtat geatnegahttet iežaset ovddidit eamiálbmogiid vuoigatvuođaid.