Gáibádusat listaevttohussii
Guoská organisašuvnnaide mat eai leat registrerejuvvon Sámedikkis
Listaevttohusa fertejit vuolláičállit unnimusat 30 olbmo geat leat registrerejuvvon Sámedikki válgajienastuslogus guoskevaš biirres. Listaevttohusas sáhttet áinnas leat eanet go 30 vuolláičállosa, muhto fertejit leat unnimusat 30 olbmo geat leat duogábealde listaevttohusa.
Listaevttohusas galgá leat luohttámušolbmo ja várrelahtu namma sin searvvis geat leat vuolláičállán listaevttohusa.
Jos ii leat biddjojuvvon gii lea luohttámušolmmoš ja várrelahttu, de navdit mii ahte guokte bajimuš nama vuolláičálliin leat luohttámušolmmoš ja várrelahttu.
Guoská organisašuvnnaide mat leat registrerejuvvon Sámedikkis
Organisašuvdna ferte leat ožžon unnimusat 60 jiena ovtta válgabiirres dahje unnimusat 200 jiena olles riikkas ovddit válggain (válga 2013).
Dáid bellodagaid/joavkkuid listaevttohusaid galget leat vuolláičállán organisašuvnna báikkálaš ossodagas unnimusat guokte stivralahtu válgabiirres.
Jos registrerejuvvon organisašuvdna bidjá listaevttohusa ovttas registrerekeahtes joavkkuin, guoská dattetge gáibádus ahte fertejit leat unnimusat 30 olbmo vuolláičállán, geat leat registrerejuvvon biirre válgajienastuslogus.
2017 válggaid oktavuođas devdet čuovvovaš organisašuvnnat gáibádusa unnimusat 60 jiena ektui válgabiirres dahje unnimusat 200 jiena olles riikkas ovddit válggain:
Bargiidbellodat/Arbeiderpartiet
Árja
Ovddádusbellodat/Fremskrittspartiet
Olgešbellodat/Høyre
Norgga Sámiid Riikasearvi/Norske Samers Riksforbund
Sámeálbmotbellodat/Samefolkets parti
Guovddášbellodat/Senterpartiet
Listaevttohusa galget čuovvut čuovvovaš mildosat:
- Geahčastat evttohasaid riegádandáhtoniin
- Geahčastat mas čuožžu sin riegádandáhton ja poastačujuhus, geat leat čállán vuollái listaevttohusa
- Jos evttohas ii álbmotregistara dieđuid mielde ása válgabiirres dalle go listaevttohus buktojuvvo, de ferte mielde leat julggaštus evttohasas ahte son lea válgadohkálaš válgabeaivvi
- Jos evttohas ii leat válgadohkálaš virggis geažil, de ferte biddjojuvvot mielde julggaštus evttohasas ahte lea heaitán virggis válgabeaivve
Listaevttohusaid meannudeapmi:
Listaevttohusa sáhttá geassit ruovttoluotta. Dat ferte dahkkojuvvot maŋimuštá cuoŋománu 20. b. 2017.
Sámedikki válgalávdegoddi meannuda listaevttohusaid ja dohkkeha válgalistaevttohusaid ja válgalisttaid máhcaheami.
Listaevttohusaid dohkkehan áigemearri lea geassemánu 1. b. 2017.
Listaevttohusat biddjojuvvojit geahččama várás dađistaga go dat bohtet sisa.
Jos listaevttohus ii leat biddjojuvvon láhkaásahusaid mielde go dat buktojuvvo sisa, de ferte válgalávdegoddi geahččalit heivehit listta nu ahte lea ásahusaid mielde šiehtadallama bokte listta luohttámušolbmuin.
Dalle go listaevttohus lea joavdan, de dieđihuvvo buot evttohasaide ahte leat biddjojuvvon listaevttohussii, maiddái vejolašvuođa birra ohcat luvvejuvvot eret listtas.
Jos muhtun evttohasa namma lea máŋgga listtas dahje juo vuolláičálli lea vuolláičállán máŋga listta, de ferte guoskevaš olmmoš dieđihit guđe listaevttohusas son háliida leat.
Jos diehtu ii boađe ruovttoluotta, de dat olmmoš fievrriduvvo dan listii mii lea buktojuvvon ovddimus.
Rievdadusat maid sáhttá dahkat listaevttohusas:
Evttoheaddjit sáhttet rievdadit listaevttohusa dušše dalle go lista galggašii dávistit gáibádusaide. Ii leat vejolašvuohta dahkat eará rievdadusaid go mat leat dárbbašlaččat listaevttohusa dohkálašvuhtii, ovdamearkka dihtii ii leat lohpi rievdadit evttohasráiddu, jos ii leat duhtavaš dainna.
Jos muhtun evttohas sihkkojuvvo eret listaevttohusas, de ferte listabiddji mearridit ahte galgá go guoros sadjái biddjojuvvot ođđa namma, vai sirdojuvvojit go čuovvovaš evttohasat bajás ja ahte lista dievasmahttojuvvo ođđa namain vuolimusas.
Váidda
Sámedikki válgalávdegotti dahkan mearrádusa sáhttá váidit. Váiddaáigemearri lea 7 beaivve maŋŋá go dohkkehuvvon listtat leat almmuhuvvon almmolaččat.
Evttohasaid luvven:
Evttohasa sáhttá luvvet jos son lea deavdán 60 jagi ovdal jagi 2017 loahpa, dahje lea leamaš sámediggeáirras maŋimuš njeallje jagi dahje jos ii sáhte dikšut doaimmaid Sámedikki áirrasin almmá eahpegovttolaš váttisvuođaid haga.
Geahčastat man ollu unnimusat ja eanemusat sáhttet leat evttohasat listaevttohusas:
Válgabiire 1 Nuortaguovlu: unnimusat 9, eanemusat 10
Válgabiire 2 Ávjovárri: unnimusat 9, eanemusat 16
Válgabiire 3 Davviguovlu: unnimusat 9, eanemusat 12
Válgabiire 4 Gáisi: unnimusat 9, eanemusat 10
Válgabiire 5 Viesttarmearra: unnimusat 9, eanemusat 10
Válgabiire 6 Åarjel Saepmie: unnimusat 9, eanemusat 9
Válgabiire 7 Lulli-Norga: unnimusat 9, eanemusat 12