Digitála árgabeaivvis leat mánát dieđusge aktiiva, ja ollugat máhttet ođđaseamos digitála čovdosiid geavahit ollu buorebut go váhnemat. Nu go mii diehtit, de dáin forain deattuhuvvojit dávjá dohkkeheapmi, ustibat ja ”likes”.
-Go maiddái rávesolbmuide sáhttá leat gáibideaddjin, de mii sáhttit dušše jurddašit mo ollu mánát ja nuorat vásihit dan. Rávesolbmot fertejit logget iežaset mánáid eallimii sosiála mediain, dadjá sámediggeráđđi Silje Karine Muotka.
Váldde áiggi ruovttoluotta
-Mun gehččen MGP junior ovtta iežan 11-jahkásaččain mannan basiid. De mun fuomášin ahte máŋgga dáhpáhusas lei sáhka das ahte váldit áiggi ruovttoluotta ja bisánastit. Mathea Mari vuittii bihtáin Hashtag Online mii lei dan birra ahte mii geavahit menddo ollu loggenáiggi. Mu mielas dat lea muittuhussan maiddái midjiide rávesolbmuide, dadjá Muotka.
Oaidnemeahttun givssideapmi
Váddáseappot lea fuobmát oaidnemeahttun givssideami go dan givssideami mii oidno. Muhto oaidnemeahttun givssideamis sáhttet maid leat stuorra váikkuhusat ovttaskas olbmui. Vaikke vel lea ge dan váddáseappot fuobmát, de mii fertet dan duođas váldit. Go mii árjjalaččat čuovvut mielde maid mánát ja nuorat dahket sosiála mediain, de mii rávesolbmot sáhttit fuobmát oaidnemeahttun givssideami, ja váldit ovddasvástádusa rávesolmmožin go mii árjjalaččat gieđahallat dan, dadjá sámediggeráđđi Silje Karine Muotka.
Rávesolbmot duddjojit ustitvuođa neahtas
Dán jagi kampánnjafilmma namma julggaštusa oktavuođas givssideami vuostá lea “Rávesolbmot duddjojit ustitvuođa neahtas” ja loahppá ávžžuhusain ahte logget sisa mánáid eallimii. Mu mielas dat lea deaŧalaš ávžžuhus, dadjá Muotka, gii ávžžuha rávesolbmuid geahččat kampánnjafilmma, áinnas ovttas iežaset mánáiguin.