Sámediggi ii leat jagi 2004 rájes vásihan ná geahnohis stáhtabušeahta. Sámediggeráđđi Ann-Mari Thomassen čujuha ahte hui uhccán sámi áŋgiruššamat vuhttojit. – Lea njulgestaga lohpádusrihkkun ráđđehusa bealis.
Sámediggeráđđi Thomassen čujuha stáhtaministara lohpádusaide ođđajagimánus ahte alitalit ráđđehus áiggui joatkit ráđđehusa sámepolitihka ja su mielas boahtá čielgasit ovdan ráđđehusa stáhtabušeahttaevttohusas ahte dat eai áiggo doallat iežaset lohpádusaid sámi álbmogii.
- Stáhtaministtar lea ovdal dadjan ahte Sámediggi lea deaŧalaš sidjiide ja ahte sámepolitihka linnját galget jotkojuvvot. Dađibahábut ii oro leamen nu, go sii áigot njulgestaga gáržžidit sámi servodaga. Dat lea duođalaš, ja imaštan manne stáhtaministtar lea molsun oaivila, dadjá Thomassen.
Lassin dan oktiibuot 6 miljon ruvdnosaš geahpedeapmái Eanandoallodepartemeantta juolludemiin, de vásiha Sámediggi ahte eat oaččo bálká- ja haddegoargŋuma seamma láhkai go muđui stáhtabušeahtas.
- Dás leat stuorra váikkuhusat Sámedikki jagi 2015 bušehttii. Mis lea uhcit maid juohkit, mii fas čuohcá sámi álbmogii, vuođđoealáhusdoaimmaheddjiide erenoamážit. Stuorradiggái ii leat menddo maŋŋit čađahit rievdadusaid. Sii fertejit dál oaidnit ahte bušeahttaevttohus čuohcá sámi servodahkii, cealká sámediggeráđđi Ann-Mari Thomassen.
Gulahalli:
Sámediggeráđđi Ann-Mari Thomassen, tlf. 900 57 123.