AIEC2016, Árktalaš eamiálbmot oahppokonferánssa lágiduvvo Guovdageainnus njukčamánu 14.-17 b. boahtte jagi. Váldologaldallin lea máilmmi eanemus dovddus eamiálbmotdutki Linda Tuhiwai Smith.
Linda Tuhiwai Smith girji eamiálbmotdutkama hárrái “Decolonizing methodologies” álmmuhuvvui 1999:is. Girji lea pensum dievva universitehtain birra máilmmi ja jorgaluvvon máŋgga gillii. Smith ákkastallá earret eará ahte oarjemáilmmi diehtooaidnu maid lea heivehuvvon oarjemáilmmi stivrenvuohkái ja lea oassin fápmostallamis.
-Smith jurddašeapmi ja máhttu lea movttidahttán olbmuid miehtá máilmmi, ja mun illudan su gullat su dáppe Sámis, lohká Sámedikki presideanta Aili Keskitalo.
Linda Tuhiwai Smith boahtá Guovdageidnui AIEC2016 oktavuođas, Arctic Indigenous Education Conference 2016. Sámediggi ja Sámi Allaskuvla lágideaba AIEC2016 njukčamánu 14.-17 b.
Mannan eamiálbmogiid internašunála árktalaš oahpahuskonferánsa lágiduvvui Iqaluitas, Canadas 2012 is, ja dál lea Sámediggi váldán badjelasas dan barggu.
100 oasseváldi
Konferánsa lea rabas buohkaide, muhto lea vuosttažettiin oaivvilduvvon oahppo- ja dutkansuorgái, mánáidgárddiid dásis gitta dutkamii.
Ulbmil konferánssain lea juogadit vásáhusaid ja ovdamearkkaid, ja digáštallat hástalusaid eamiálbmot oahpahusas, mánnávuođas gitta alit oahpahusa dássái. Fáddá lea “Revitaliseren – hástalusat ja ođđa perspektiivvat oahpahusas”.
Konferánsii vuordit sullii 120 olbmo iešguđet árktalaš guovlluin nugo Sámis, Ruonáeatnan, Canada jna. Váldologaldalli Sámi bealis lea Asta Balto, gii máŋgalot jagi jo lea bargan Sámi pedagogihkain.
Nannet oahpahusovttasbarggu
Konferánssa olis lágiduvvo maid ministtarčoahkkin mas lea ulbmil vuolláičállit šiehtadusa mii nanne ovttasbarggu eamiálbmot oahpahusa ektui, earret eará boahttevaš konferánssaid bokte.
Čoahkkin lágiduvvo njukčamánu 16. B. Dán čoahkkimii servet oahpahusministarat eará árktalaš guovlluin, ja Sámedikki presideanta.
Loga eambbo konferánssa neahttasiidus: