- Lean duhtavaš go sámi ealáhusdoaimmaheaddjit ja ovddasteaddjit oassálaste dán jagi biebmomessui. Dat čájeha ahte sámi biebmokultuvrra ja mátkeeallima sáhtus lea loktejuvvon nationála dássái. Das mii leat rámis, dadjá sámediggeráđđi Mariann Wollmann Magga, gii oassálasttii meassu rahpamii ođđajagimánu 20. b.
Eanadoallo- ja biebmoministtar Jon Georg Dale oassálasttii maiddái biebmomessui.
Áidnalunddot biebmokultuvra
Davvi-Norga ja sámi biebmobuvttadeaddjit leat ovddastuvvon meassus viđa jagi maŋŋálagaid mannan jagi rádjai. Sámediggeráđi mielas dat čájeha ahte sámi biebmokultuvra lea áidnalunddot riikadásis, juoidá maid Sámediggi áigu dihtomielalaččat geavahit iežas áŋgiruššamis biepmu viidásat ráhkademiin.
- Oainnán ahte leat stuorra vejolašvuođat erenoamážit das ahte sámi biebmoerenoamášvuođat leat álkit fidnemis geavaheddjiide, čatnaseapmi gaskal biebmoáŋgiruššama ja mátkeeallima nannešii goappašiid ealáhusaid, dadjá sámediggeráđđi Mariann Wollmann Magga.
-Min mielas lea rápmin oassálastiide Ellinor G. Utsi Davvi Siiddas ja Eva Nordfjell Rørosreinas, go biebmoministtar bovde sudno searvat ráđđehusa áŋgiruššamii báikkálaš biepmuin ja mátkeeallimiin, dadjá Magga.
Maiddái ealáhusorganisašuvdna Norgga Boazosápmelaččaid Riikkasearvi jođiheaddji Ellinor Marita Jåma bokte oassálasttii biebmosáttagoddái.
Áigot dahkat sámi biepmu dovddusin riikkaidgaskasaččat
Sámediggi lea jagi 2017 vuoruhan áŋgiruššat ovddidemiin biebmoerenoamášvuođaiguin sámi guovlluin.
- Mii oassálastit maiddái ovttasbargui stuorát biebmoprošeavtta ovddidemiin maid Innovašuvdna Norga jođiha. Višuvdna lea dahkat Davvi-Norgga dovddus riikkaidgaskasaš biebmoguovlun ja sávan ahte mii sáhttit joatkit váldoprošeavttain dán jagi. Doaivvun ahte mii sáhttit lasihit sámi biepmu viidásat ráhkadeami – sihke boazodoalus, eanadoalus ja guolásteamis ja buot luondduláhjiin, dasa lea stuorra vejolašvuođat, loahpaha Magga.