foreløpig_kulturprogram_20130318.pdf 113,44 kB
Mari Boine ja inuihtta Nive Nielsen leaba váldobivnnuhiid gaskkas riikkaidgaskasaš álgoálbmotkonferánssa áiggi Álttás dán geasi. Miehtá Álttá guovddáža čalmmustuhttojuvvo álgoálbmotkultuvra geassemánu 9. b. rájes 12. b. rádjai.
Álgoálbmotkonferánssa Áltá 2013 kulturprográmma lea válmmas, ja juohke beaivvi lágiduvvojit máŋga kulturdoaimma riikkaidgaskasaš konferánssa áiggi. Konferánsa álggahuvvo vuostáiváldimiin Allaskuvllas Álttás sotnabeaivvi geassemánu 9. b., ja loahpahuvvo olgokonsearttain Áttá guovddážis Mari Boine ja Nive Nielsen bokte gaskavahku geassemánu 12. b.
- Mii leat hui ilus go dát guokte čeahpes artistta Mari Boine ja Nive Nielsen leaba miehtan loahpahit dán konferánssa, mii lea nu deaŧalaš álgoálbmogiidda. Dat lea mielde geasuheamen konferánsii ja álgoálbmotpolitihkkii. Muhto vuosttažettiin leat Álttá ássit ja guossit mielde positiiva láhkai báidnimin dán kulturvahku loahpaheami, dadjá Áltá 2013 kulturprográmma ovddasvástideaddji Sara Margrethe Oskal, Sámedikkis.
Vuosárgga geassemánu 10. b. čájeha Beaivváš Sámi Teáhter Nils Aslak Valkeapää bihtá ”Ridn `oaivi ja nieguid oaidni” Álttá kulturlanjas. Maŋebárgga geassemánu 11. b. lea Álttá guovddážis olgokonsearta, mas báikkálaš skuvllat leat mielde. Juohke beaivvi konferánssa áiggi lágiduvvojit šilljogávppašeamit Álttá guovddážis ja iešguđet dáiddačájáhusat Finnmarkshallenis. Hállas čájehuvvojit maiddái govat maid dan 7 iešguđet álgoálbmotregiovnna mánát leat ráhkadan fáttáin “Mu niehkobarta”.
- Mii háliidit ahte galgá leat fálaldat buohkaide, ja min ulbmil lea oažžut olles Álttá báikegotti mielde. Valáštallansearvi BUL lágida šilljogávppašeami, mánát ja nuorat servet ollu lágidemiide. Mii háliidit ahte konferánsa vuhttot maiddái báikkálaččat Álttás, dadjá Oskal.
foreløpig_kulturprogram_20130318.pdf 113,44 kB
Gulahalli
Ráddeaddi Sara Margrethe Oskal, tel. 78 48 42 32, Áltá 2013 kulturprográmma ovddasvástideaddj.
Leaŋkat
Mari Boines neahttasiidu
Nive Nielsens neahttasiidu
Beivváš Sámi Teahter neahttasiidu