Sámediggeráđđi mátkkošta 33. Vahkus (borgemánu 10-14 b.) Finnmárkku mearrasámi giliin háhkan dihtii oaiviliid Sámedikki mearrasámi strategiijii. Sámedikki presideanta Aili Keskitalo lea ieš mielde muhtun osiin mátkkis.
Ráđi áigumuš lea háhkat čiekŋalet áddejumi mearrasámeguovlluid hástalusain ja vejolašvuođain, ja mátkki fáddán lea sihke guolásteapmi, ealáhusovddideapmi ja kultuvrralaš ealáskahttin.
- Mii háliidit dovdat buot hástalusaid ja heajos sojuid, muhto buot eanemusat mii háliidit hábmet dakkár mearrasámi politihka mas lea boahtteáiggemokta. Danne ohcat eanet oassálastiid geat sáhttet čájehit ahte lea vejolaš lihkostuvvat dálá struktuvrraid olis, dadjá sámediggeráđđi Silje Karine Muotka, geas lea politihkalaš ovddasvástádus mearrasámi strategiijas.
Mátkái vulget Várggáin ja johtet Báhcavuona, Donjevuona, Gáŋgavuona, Gilevuona, Sáltesávjju, Billávuona ja Smiervuona bokte Ávanuorrái.
- Áinnas galggašii leat áigi ja várri galledit juohke áidna mearrasámi gili, muhto go mis ii leat go vahkku geavahussii, de leat ferten válljet. Mu mielas prográmma lea nu ahte mii sáhttit oažžut buriid árvalusaid min viidáset bargui, dadjá Muotka.
Sámediggeráđi bealis:
Aili Keskitalo, sámediggepresideanta (vuosárggas gaskavahkkui)
Silje Karine Muotka, sámediggeráđđi
Henrik Olsen, sámediggeráđđi (maŋebárggas bearjadahkii)
Runar Myrnes Balto, politihkalaš ráđđeaddi
Preassa:
Preassa lea bovdejuvvon čuovvut prográmma mátkkis. Čoahkimat gielddaiguin ja organisašuvnnaiguin ii leat rabas mediaide.
Politihkalaš ráđđeaddi Runar Myrnes Balto: 977 73 778
Gulahallandirektevra Jan Roger Østby: 481 44 696