Sámediggeráđđi/Sametingsråd Silje Karine Muotka. Foto: Sara Beate Eira Persson, Sámediggi
– Báikegottit ja olbmot geat orrot rittus galget sáhttit oažžut birgejumi dain resurssain mat leat lagaš guovllus ja háhkat eallinfámolaš báikegottiid gos olbmot háliidit ássat, dadjá sámediggeráđđi Silje Karine Muotka.
– Sámedikkis lea ásaheamis rájes 1989 leamaš nana politihkalaš áŋgiruššan mearrasámi guovlluid ektui. Ođasmuvvi ja ceavzinnávccalaš luondduvuđot ealáhusat leat vuođđun ja mis leat čielga áigumušat ain eallit ja viežžat birgejumi dán guovllus ollu sohkabuolvvaid ovddas guvlui, dadjá Muotka.
Strategiijat lea politihkalaš dokumeanta mas leat guovddáš bealit movt Sámediggi sáhttá bargat vejolašvuođaid ektui ja sihkkarastit boahtteáiggi riddui ja nie maid mearrasámi kultuvrra.
– Luondduresurssaiguin ávkkástallan ja vejolašvuohta viežžat birgejumi min oktasaš resurssain ferte vuođđuduvvot čielga bivdovuoigatvuođaide mat sihkkarastet báikkálaš guolásteddjiide vejolašvuođa bivdit jahkásaš reguleremiid bokte, dadjá Muotka.
Sámediggeráđđi oaivvilda ahte vuoigatvuođat ja bivdoearit fertejit leat nu stuorrát ahte álbmot mearrasámi guovlluin sáhttá oažžut dohkálaš dietnasa bivddus.
– Mearrasámi vuoigatvuođaid dohkkeheapmi lága bokte lea bajimuš oassi sámiid árbevirolaš birgejumi ain bisuheamis. Vuotnabivdolávdegoddi, mii nammaduvvui 2014:s, lea buorre mielde hálddašaninstánsa. Šállošahtti lea dattetge dat go lávdegoddi dán rádjai ii leat ožžon dohkálaš doaibmabušeahta, ahte dat sáhtášii ollašuhttit bargamušaid mat das leat mandáhta vuođul, dadjá Muotka.
Sámediggeráđi oaivila mielde galggašedje fylkapolitihkkarat geat leat jurddašišgoahtán doaimmaid guovloođastus ektui, ahte sihke Sámediggi ja vuotnabivdolávegoddi leat dakkár orgánat main sáhtášii leat rolla sakka nanosmahttojuvvon regionála guolástushálddašeamis.
Jearahallama sáhttá addit sámediggeráđđi Silje Karine Muotka, telefovdna 984 87 576.