Mieđihuvvui dan Sámedikki gáibádussii ahte sii geat bivdet dorski riidoguolástusearis davábealde 62. govdodatgráda, galget oažžut stuorát eriid. Earit lasihuvvojit dál 12 tonnas 24 tonnii juohke fatnasa nammii. Ráđđelahttu Silje Karine Muotka lea hui duhtavaš Guolástusdirektoráhta mearrádusain.
- Dát duođaid illudahttá. Dat lea stuorra vuoitun riidoguolásteddjiide, addá mearrasámi álbmogii stuorát vejolašvuođa birgejupmái dán dálvvi. Mii diehtit ahte dál dat lea dat buoremus bivdu stuorra osiin Finnmárkkus, danne livččii lean boastut bissehit bivddu dál, dadjá Muotka.
Guolástusdirektevra dieđihii ára ahte friija bivdu bissehuvvo duorastaga cuoŋománu 3. b. rájes. Dát lei váttisvuohtan daidda fatnasiidda mat bivdet vuonain ja Finnmárkkus, gos guolli aiddo lea boahtán. Sis ii livččii lea vejolašvuohta oažžu ávkki dan stuorra guollehivvodagas mii dál lea sin lagasguovlluin.
Dieđihuvvon bisseheami ággan lei ahte joavkoearri fargga lei bivdojuvvo ja Guolástusdirektevrra mielas lei dárbu ráddjet bivddu. Dieđihuvvon bivdogielddus lea dál fámohuhttojuvvon go fatnasat leat ožžon duppalastojuvvot eriideaset.
- Mearrádus lea riekta ja deaŧalaš riidui. Dál ožžot eanet guolásteaddjit vejolašvuođa bivdit dorski dán dálvvi, loahpaha Muotka.
Gulahalli:
Ráđđelahttu Silje Karine Muotka, tel. 984 87 576