Máhttolokten ja Máhttolokten sámi, galget ođasmahttojuvvot. Dálá fágat galget bisuhuvvot, muhto galget ođasmahttojuvvot ja sisdoallu galgá vuoruhuvvot ja dahkkojuvvot eanet relevántan ohppiide boahtteáiggis.
Geasi 2017 rájes lea bargojoavku iešguđege fágain ráhkadan evttohusa deaŧaleamos sisdoalus ja dat gohčoduvvojit guovddášelemeantan. Guovddášelemeanttat leat deaŧaleamos fáttát fágain, maid oahppit fertejit máhttit fágas. Guovddášelemeanttat leat oktasaččat sihke sámi ja dáru skuvlii.
Bargu guovddášelemeanttaiguin lea ođastusbargu. Norggas ii leat ovdal leamaš dán lágan teaksta ovddeš oahpponeavvodahkosiin. Sámedikkis lea ovddasvástádus oahppoplánaid ráhkadeamis fágii sámegiella ja sámi sisdollui buot eará fágain. Bajimuš oassi – árvvut ja prinsihpat vuođđooahpahusas mearridit ahte skuvla galgá atnit ávvira sámi gielas ja kulturárbbis.
Sámediggái lea leamaš deaŧalaš oainnusmahttit ja sihkkarastit sámi sisdoalu fágain. Sámi mánát galget oahppat dan seamma maid buot eará mánát Norggas, muhto sámi vuolggasajis – sámi kulturárvvuid vuođul. Sámediggi lea proseassas addán cealkámuša sámi sisdoalu birra, dalle go fágaide evttohuvvojit guovddášelemeanttat.
Joavkkut loahpahedje bargguideaset juovlamánus 2017 ja leat ovddidan vuoruhemiid fágain maid oahppoplánajoavku galgá geavahit dalle go bargá viidáseappot fágaid gelbbolašvuođain. Evttohus guovddášelemeanttaid birra lea biddjojuvvon Oahpahusdirektoráhta siidduide. Sámediggái lea erenoamáš miellagiddevaš gullat gokčet go evttohusat dan mii lea buot deaŧaleamos sámi mánáide oahppat, ja maid buot mánát Norggas galget oahppat sámiid birra.
Sámediggi ávžžuha skuvlaeaiggádiid, skuvlajođiheddjiid, vánhemiid, fuolaheddjiid ja buohkaid geat beroštit skuvllas dadjat maid sii oaivvildit lea buot deaŧaleamos oahppat skuvllas.
Don sáhtát addit cealkámuša Oahpahusdirektoráhta neahttasiiddus. Doppe sáhtát addit cealkámuša ovtta dahje máŋgga fágii ja fáttáide. Áigemearri lea cuoŋománu 17. b. 2018.