- Guolástusministtar ii leat váldán vuhtii mearrasámi kulturvuođu ja dárbbu ain beassat doaimmahit lotnolasealáhusaid vuonain ja rittus, go dadjat ija badjel sihkastuvvo ollu smávvafanaseaiggádiid dienasvuođu deaŧalaš oassi, dadjá sámediggeráđđi Silje Karine Muotka.
Su mielas lea áibbas eahpegovttolaš vuordit ahte olbmot galget nuppástuhttit iežaset dainna lágiin ahte oastit stuorát bivdofatnasa guovtte-golmma beaivve dieđihemiin.
– Lea stuorra riska juohkehažžii árvvoštallat guđe investeremiid sii galget čađahit, go olles reabbáhálddašeapmi galgá árvvoštallojuvvot. Vuordá go duođaid ministtar ahte guolásteaddjit galget duostat čađahit dakkár investeremiid, go son ieš čájeha ahte gáibádusat fanasguhkkodahkii sáhttet rievdat ija badjel, jearrá Muotka.
Sámediggeráđđi oaivvilda ahte ii leat buorre ja einnostanvejolaš hálddašeapmi mearridit dakkár njuolggadusrievdadusaid dušše guokte beaivvi ovdalgo bivdu álggahuvvui. Son oaivvilda maiddái ahte direktoráhta ja departemeanta vealahit gitta ja rabas joavkku fatnasiid mat leat oanehat go 6 mehtera – go 3 fatnasa mat leat oanehat go 6 mehtera gitta joavkkus besset bivdit reappáid, muhto 43 fatnasa rabas joavkkus ain eai beasa oassálastit bivdui.
- Dálá stuorradiggedieđáhusas reabbábivddu birra lea vuođđoprinsihppan dat ahte sii geaidda reabbá čuohcá, galget maiddái beassat ávkkástallat reappáin resursan. Go reabbábivdu rahppojuvvui, de dat lei várrejuvvon fatnasiidda mat leat oanehat go 11 mehtera. Dál, go čájehuvvo ahte dát bivdu lea gánnáhahtti ja das lea mearkkašupmi, de čađaha ministtar dakkár politihka ahte olgguštit smávvafatnasiid, dadjá Muotka.
- Mun oaivvildan ahte ministtar vuosttalda dan konsultašuvdnašiehtadusa maid sámediggepresideanta ja ministtar čáliiga vuollái juovlamánus. Go ministtar hilgu čađaheames konsultašuvnnaid, de son dovddaha dan ahte ii háliit deaivvadit Sámedikkiin gávdnat buoret čovdosiid. Son lea ovddalgihtii dahkan mearrádusa ii ge háliit digaštallat gávdnan dihtii čovdosiid, loahpaha Muotka.